Հովանաւորութեամբ՝ Թեհրանի հայոց թեմի առաջնորդ Սեպուհ արք. Սարգիսեանի, Ս. Աստուածածնայ
վերափոխման տօնին առիթով, 12 եւ 13 օգոստոսին տեղի ունեցած է երկօրեայ ուխտագնացութիւն՝
դէպի Ռաշտ եւ Անզալի քաղաքները։ 13 օգոստոսի առաւօտեան սրբազանը Անզալիի Ս. Աստուածածին
եկեղեցւոյ մէջ մատուցած է սուրբ պատարագ, որուն ընթացքին վեր առնելով Վերափոխման տօնին
խորհուրդը՝ նշած է որ այս տօնը սերտօրէն առնչուած է նաեւ մայրութեան գաղափարին հետ, եւ
այդ պատճառով կը տօնենք նաեւ հայ մօր տօնը ըսած է ան ։ Անդրադառնալով Մեծի տանն Կիլիկիոյ
կաթողիկոսին կողմէ 2010 տարին Հայ կնոջ տարի հռչակուելուն՝ ան շեշտած է, որ հայ կինը
փառքն ու պատիւն է հայ տան՝ աւելցնելով, որ ան իր ճակատագրական դերը ունեցած է հայոց
ամբողջ պատմութեան մէջ։ Իր քարոզին մէջ սրբազանը նաեւ անդրադարձած է խաղողօրհնէքի կրօնական
եւ աւանդական իմաստին, անկէ բխող աւանդութիւններուն եւ սովորութիւններուն կառչած մնալու
անհրաժեշտութեան։