Papa për 100 vjetorin e lindjes të Nënë Terezës: dhuratë tejet e çmueshme për botën
Mesazh i Papës Benedikti XVI për 100-vjetorin e lindjes së Nënë Terezës, drejtuar
Eprores së Misionareve të Bamirësisë
Motrës Prema, M.C Eprore
e Përgjithshme e Misionareve të Bamirësisë Përshëndes me përzemërsi ju dhe të
gjitha misionaret e Bamirësisë, me rastin e kremtimeve të 100-vjetorit të lindjes
së të Lumes Nënë Tereza, themeluese e Kongregatës suaj dhe shembull i jashtëzakonshëm
virtytesh të krishtera. Jam i bindur se ky vit do të jetë për Kishën dhe botën, rast
për ta falenderuar me shpirt Zotin për dhuratën e paçmuar, që ishte Nënë Tereza gjatë
jetës e edhe pas saj, përmes punës së palodhur e plot dashuri, që bëni ju, fëmijët
e saj shpirtërorë. Në përgatitjen për këtë vit jeni përpjekur t’i afroheni më
shumë Jezusit, etja e të cilit për shpirtra shuhet nga shërbimi që i bëni Atij, në
më të varfërit e të varfërve. Duke iu përgjigjur me besim thirrjes së drejtpërdrejtë
të Hyjit, Nënë Tereza i tregoi botës si mund të vihen në jetë fjalët e shën Gjonit
ungjilltar: “Të dashur, në qoftë se Hyji na ka dashur ashtu, edhe neve na duhet ta
duam njëri-tjetrin… Nëse duam njëri-tjetrin, Hyji mbetet në ne dhe dashuria e tij
në ne është e përkryer” (1 Gjn 4,11-12). Kjo dashuri vazhdoftë t’iu frymëzojë
ju, si misionare të Bamirësisë, që t’ia dhuroni veten me bujari Jezusit, të cilin
e shihni dhe i shërbeni tek të varfërit, të sëmurët, të vetmuarit dhe të braktisurit.
Ju inkurajoj të merrni shembull vazhdimisht nga përshpirtëria e Nënë Terezës dhe pas
gjurmëve të saj, të pranoni ftesën e Krishtit: “Eja, bëju drita ime”. Duke u bashkuar
shpirtërisht me kremtimet e 100-vjetorit dhe me dashuri të madhe në Hyjin, iu jap
me gjithë zemër Misionareve të Bamirësisë dhe të gjithëve atyre që u shërbeni, Bekimin
tim atëror Apostolik.