Letër e motër Mary Premës, Eprore e Përgjithshme e Misionareve të Bamirësisë, drejtuar
bashkëpunëtorëve për 100-vjetorin e lindjes së Nënë Terezës
(26.08.2010 RV)Të dashur vëllezër e motra kudo nëpër botë
Nënë Tereza
lindi 100 vjet më parë në Shkup (Maqedonia aktuale), më 26 gusht 1910. Puna dhe
vepra e saj vazhdon të jetë frymëzim për të rinj e të moshuar, për të pasur e të varfër
nga të gjitha shtresat shoqërore, fetë apo kombet. Mesazhi i saj: “Zoti na ka krijuar
për gjëra të mëdha – për të dashur e për t’u dashur”, na bën të shohim përtej betejave,
vetmisë dhe padrejtësive të jetës së përditshme. Ne jemi të thirrur për diçka jashtëzakonisht
më të madhe se sa pasuria, talenti, fama ose kënaqësitë e çastit. Ne jemi të thirrur
të shohim Zotin, Atin tonë të dashur, dhe të kuptojmë se Ai na do me një dashuri pa
kushte, të ëmbël e të amshuar; e ne jemi të thirrur ta ndajmë atë dashuri me njerëzit
që na rrethojnë, duke filluar nga familja. Sipas fjalëve të Nënës, “Buzëqeshini njëri-tjetrit,
gjeni kohë për njëri-tjetrin në familje. Nuk mund ta marrim me mend sa mirë mund të
bëjë një buzëqeshje e thjeshtë”. Në Shtëpinë tonë të Fëmijëve (Shishu Bhavan)
në Kalkutë, ka jetuar deri 39 vjeç një vajzë me të meta të mëdha fizike. Emri i saj
ishte Sundari, që do të thotë “e mrekullueshme”. Ajo s’kishte asgjë e s’mund të bëntë
asgjë me trupin e saj të kapërthyer, vetëm rrinte në shtrat. Por një gjë e bënte mirë
– dhuronte një buzëqeshje të jashtëzakonshme, më një gëzim që i ndriçonte krejt fytyrën
e që komunikonte dashurinë e madhe, që kishte në zemër. Ajo e dinte se kishte njerëz
që e donin dhe kujdeseshin për të, se ajo ishte e çmuar për shumëkënd. Sundari nuk
ishte e bukur, por ajo ishte jashtëzakonisht e mrekullueshme. Le të kremtojmë
100-vjetorin e lindjes së Nënës duke e ndarë gëzimin e dhënies e të marrjes së dashurisë.
Të lutemi që ta shohim më mirë dashurinë e Zotit për ne. Plot me dashurinë e Zotit,
ne do të bëhemi bartës të dashurisë së Tij për ata që na rrethojnë, duke bërë gjëra
të vogla me dashuri të madhe, duke dhuruar një buzëqeshje, një fjalë të mirë dhe një
dorë për ndihmë. Këto gjëra të vogla, bërë me dashuri të madhe, do ta bëjnë jetën
tonë “diçka të mrekullueshme për Zotin”. Kështu, bota përreth nesh do të shndërrohet,
sepse “Buzëqeshja bën të lindin buzëqeshje e dashuria thërret dashurinë”.
Zoti
ju bekoftë Motër M. Prema M.C. Eprore e Përgjithshme