Vatikani pohon se disa nga organizmat ndërkombëtare e promovojnë abortin
(25.08.2010 RV)“Disa nga organizmat ndërkombëtare, si Fondi i Kombeve të Bashkuara
për popullsinë (Unfpa), janë duke provuar ta promovojnë abortin si të drejtë njerëzore,
pikërisht në Vitin ndërkombëtar të të rinjve, që OKB-ja e përuruoi më 12 gushtin
e kaluar”. Është denoncim i gazetës vatikanase ‘L’Osservatore Romano’ dhe Radios
sonë, që citojnë kanalin e internetit të Unfpa, në të cilin ceken disa nisma në ndihmë
të të rinjve. Ndërmjet tyre, promovimi i shërbimeve për shëndetin seksual e riprodhues,
gjuhë e ndërlikuar kjo, pas së cilës fshihen fjalë krejt të kuptueshme për të gjithë:
fjalët ‘ilaçe kundër shtatzanisë”, hyrë tashmë edhe në gjuhën shqipe me një përshtatje
të lehtë gjuhësore, në formën kontracepsion apo kontraceptim, që do të tingëllonte
më shqip: “kundër jetës”, dhe fjalën ‘abort’. Flitet gjithashtu edhe për promovimin
e edukimit seksual, të çliruar nga çdo lloj paragjykimi. Gazeta ‘L’Osservatore
Romano’ dhe Radio Vatikani nënvizojnë se, ashtu si në dokumentet e përkohshme, botuar
për Konferencën përgatitore, që vijon deri më 27 gusht në Leon të Meksikës, nuk
përmendet fare Konventa për të drejtat e fëmijës, dokument që, sigurisht, nuk mund
të quhet i përsosur, por që nënvizon të drejtat dhe detyrat themelore të prindërve
për mirërritjen dhe edukimin e fëmijëve të tyre. Ftesa, që vjen nga Selia e Shenjtë,
është që organizmat, të cilat promovojnë abortin, ta kenë mirë parasysh “Magna Kartën
e Vlerave për një qytetërim të Ri”, paraqitur gjatë këtij muaji para Kombeve të Bashkuara
nga Parlamenti universal i Rinisë.