Ne vinim nga FERRI! Takimi i artistëve shqiptarë me Nënë Terezën në 1989 në Romë
Suzana Varvarica Kuka Sapo e pashë foton e hedhur në facebook hodha me fjalë
ofshamën plot trishtim dhe befasi “O my God”. Në çast mendova se është një foto plot
vlerë në çdo milimetër të saj. Desha t`i gjej një titull, por titull më domethënës
se ai që gjeta në fjalët e Mustafa Arapit nuk do të gjehej më mirë. “Ne vinim nga
FERRI”, duket një foto e çastit, dhe krejt normale që një e tillë është, por është
marrë në një vend të caktuar, në një kohë të caktuar dhe në një situatë ankthi dhe
dëshire. Ka imazhin e disa njerëzve, të cilët me punën e tyre janë sot pjesë e shoqërisë
aktive shqiptare, por mendoj se në baziken e saj ka një vlerë të pashoqe historike.
Imazhi i saj sjell një nga format e kohës së “butë” apo kohës kalimtare ndërmjet dy
kohëve, komunizmit dhe demokracisë. Vemendja ime ndaj fotos ishte e një shkalle të
lartë intensiteti, pasi edhe pse është një foto fakti ajo ruan në qendër Nënë Terezën,
figurën e një gruaje, që në ditët e sotme njihet dhe respektohet në të gjithë botën.
Ndërsa në Shqipëri është shpallur Gruaja e vitit 2010. Edhe çasti që kjo foto u hodh
në facebook lidhej plotësisht më këtë ide, por në shkaqe krejt individuale. Mustafa
Arapi një prej piktorëve të njohur në artin shqiptar të kësaj periudhe e vendosi me
qëllimin e lartë për ta kujtuar dhe respektuar Zonjën Nënë. Ajo është shkrepur prej
piktorit Adrian Devolli dhe është realizuar me aparatin e Mustafa Arapit. Imazhi i
saj realizua në vitin 1989, në Romë, në hyrjen e ndërtesës së Ambasadës së Republikës
Socialiste të Shqipërisë, e quajtur para viteve ‘90. Mustafa Arapi është krenar që
është gjendur në atë çast pranë Nënë Terezës dhe mendon se me ekspozimin në facebook
të kësaj fotoje do të shprehte respektin e tij në 100 vjetorin e lindjes së saj. Dhe
në formën më të qartë,kjo foto e ka arritur më së miri qëllimin e piktorit. Historia Fotoja ruan një histori të sajën, që është një histori fakti dhe me densitet të
fortë. Gjithashtu ajo buron dhe histori të ndryshme të personazheve që përbëjnë imazhin
e saj. Ka qenë fati i këtyre artistëve për të takuar dhe për të parë nga afër, për
herë të parë Nënë Terezën e përfoluar aq shumë nga sistemi diktatorial. Duhet të ketë
qënë një nga vizitat e Nënë Terezës në Ambasadën e Shqipërisë në Romë për arsye të
marrjes së një vize për të hyrë në tokën shqiptare dhe radha e refuzimit kategorik
prej shtetit komunist. Këto dy arsye, krejt të shkëputura nga njëra-tjetra, mendohet
se i kanë bërë bashkë artistët dhe Nënë Terezën. Fotoja ka një qendër, ka një subjekt,
ka personazhe të karaktereve të ndryshme, ka ndjesi të ndryshme, ka atmosferë dhe
i lë shumë shanse gjithkujt për të menduar, gjykuar dhe vlerësuar kohën dhe aktin
që ajo mbart. Subjektin e fotos e formojnë Nënë Tereza e vendosur në qendër dhe grupi
i artistëve shqiptarë, të cilët relativisht janë të gjithë të rinj e që janë ngucur
për t‘i qenë pranë e rreth. Nënë Tereza për kohët komuniste shqiptare ishte një grua
e njohur pak nga artistët shqiptarë dhe e gjykuar shumë rëndë nga qarqet qeveritare
diktatoriale, të cilat e kanë etiketuar përmes medias fanatike me epitete fyese të
çfarëdoshme. Ato e quajtën për shumë vite një grua të pamoralshme. Rrëfimet
mbi takimin Për të njohur e ditur më shumë rreth ngjarjes iu drejtova tre
prej personaliteve të artit pamor shqiptar të kohës sonë. Ata u shprehën optimist
për të treguar sa më shumë rreth saj. Mustafa Arapi në letrën e tij referuese shkruan.
“Zana të përshëndes. Më vjen mirë që foto krijoi interes midis miqsh artistë, njëkohësisht
më vjen mirë që nëpërmjet saj do të kujtojmë atë kohë me të mira dhe të liga. Atëherë
NA ISHTE SEÇ NA ISHTE. Na ishte një muze që po ndërtohej, kur e shikoje përballë dukej
trekëndësh me bazë poshtë si një piramidë dhe nga sipër si një shqiponjë (shqiponjë
i thënçin). Skllevërit që punuan aty si arkitektë, skulptorë dhe piktorë morën nga
një medalje si dhe një dhuratë. Dhurata ishte një udhëtim turistik nëpër Itali. Ishte
viti 1989. Nuk më kujtohet mirë por di që ka qenë verë, korrik ose gusht. Memorjen
ma freskon një shishe me ujë të ftohtë, të cilën e blemë sëbashku me Lumen, Blloshmin
e kam fjalën, kur ishim në Firence. Më kujtohet që shishja e ujit atëhere kushtonte
2000 lireta sa kushton tani këtu tek ne. U matëm 100 herë për ta blerë ujin. Kishim
gjithë ditën pa pirë ujë. Na thanë se ai i çesmeve nuk pihej. Në grupin tonë mund
të kemi qenë gjithsej rreth 35 vetë, sepse më kujtohet nga vendet në autobus. Mos
të harroj dhe dy dullbaxha, të cilët qëndronin njëri në fillim dhe tjetri në fund.
Me grupin tonë u bashkangjitën dhe disa artistë të tjerë, të cilët kishin marrë çmime
në ekspozitën kombëtare të atij viti. Zana, historia e asaj fotoje është ashtu siç
e tregon dhe Gaz Leka. Di që personi, i cili u soll keq atë ditë në ambasadë ka qenë
deri para një viti punonjës po në Ministrinë e Jashtme. Udhëtimi turistik zgjati një
javë. Rruga udhëtuese vijoi nga Gumenica, në Bari, Taranto, Ostun, Napoli, Romë, Firence
dhe kthimi po nga Gumenica. Qëllimi ishte të shihnim monumente, muze dhe galeri arti.
Zana, të dëgjosh historitë e këtij udhëtimi të vjen të qash dhe të qeshësh. Ne
ishim artistë dhe aty e kuptuam se rinia jonë na kishte shkuar për lesh. Nëse do të
shkruash gjatë e gjërë t‘i tregoj unë historitë e atij udhëtimi, por shkurt po të
them se, ne për herë të parë shihnim një botë tjetër, ne vinim nga FERRI”. Lumturi
Blloshmi tregon rastin e saj i cili është një kalvar i vërtet fyerjesh nga njerëz
të cilët Mustafai i quan dullbaxha (janë spiunët apo levat e megamakinës së madhe
komuniste të asaj kohe që e bënin këtë punë për shumë pak para), frikash prej presionit
psikologjik që i kujtonte asaj se ishte një qenie e persekutuar dhe dëshirash për
të dalë jashtë mureve të Shqipërisë e për të cekur sadopak artin perëndimor, e mbi
të gjitha atë italian. Lumja thotë se: “Ishte viti 1989, dy vjet para demokracisë.
Aq sa di unë këtë veprimtari e organizoi Ministria Arsimit e asaj kohe. Grupin tonë
e shoqëruan 4 spiunë. Midis tyre një grua e shëndoshë. Mbaj mend mirë në fillim më
thërritën në organet e sigurimit dhe më thanë të kemi caktuar edhe ty të dalësh jashtë
Shqipërisë. Më erdhi shumë e papritur pasi unë isha një prej të persekutuarve dhe
thashë se do të ishte ndonjë provokim. Më pas më thërritën e më thanë se nuk do të
shkoja. Më mirë thashë me vete. Pastaj përsëri më thërritën e më thanë se do të shkoja,
por më rikujtuan kushtet e mia sociale dhe më urdhëruan të mos arratisesha, pasi partia
më kishte dhënë dorën. Ata më vunë në dijeni për disa njerëz të tyre që do të na shoqëronin.
E di shumë mirë, mua më pranuan se kishte folur pozitivisht shkrimtari i mirënjohur,
i ndjeri Vath Koreshi”. Pasi i kërkova Gazmend Lekës mundësinë për të përdorur
thëniet e tij të shkruara për Mustafain zbuloj se atij i janë ngulitur në mendje fyerjet
e bëra ndaj Nënë Terezës prej personelit të Ambasadës Shqiptare në Romë. Ai kujton
se: “Këtë foto e kam patur dhe e kam edhe unë në arkivin tim. Nuk e di nëse e mbani
mend, i shkruan ai Arapit, kur Nënë Tereza u gjend tek porta e ambasadës, ne u grumbulluam
me një shpejtësi rrufeje rreth saj. Për këtë që ndodhi një punonjës i ambasadës u
shqetësua aq shumë sa nuk dinte se çfarë fliste, ndërkohë që i qeshte Nënës me hipokrizi.
Ai tentoi disa herë të na ndalonte duke mërmëritur nëpër dhëmbë e duke sharë. -
Kjo është armike! - Është spiune! - Mos e bëni foton! - Do i‘ua tregojmë
ne qejfin etj,etj...Më pas shau edhe më turpshëm. Tha fjalën më të turpshme. Por sa
më vjen mirë si aso kohe si dhe sot që ne nuk donim t’ia dinim. Dëshironim me çdo
kusht të bënim foton. Dhe e bëmë. Disa vite më pas, kur e takova përsëri këtë punonjës
ambasade, ia kujtova ngjarjen, por nuk e pranoi që i kishte nxjerrë nga goja atë të
vjellë!” Disa nga artistët e dalë në këtë foto janë Mustafa Arapi, Gazmend Leka,
Lume Blloshmi me kurriz, Sofokli Koci, Artur Muharremi, Genci Hajdari, Dashamir Gurabardhi,
Arben Morina, Josif Droboniku, Leon Çika e të tjerë. Pak fakte janë përmendur në këtë
shkrim dhe kjo foto e meriton të titullohet “Ne vinim nga Ferri!