62-vjetori i lindjes së Këshillit Botëror të Kishave
(23.08.2010 RV)Më 23 gusht 1948, në Amsterdam, 147 Kisha të konfesioneve të
ndryshme formuan zyrtarisht Këshillin Botëror të Kishave, një lëvizje ekumenike, që
synonte bashkimin e të krishterëve. Sot, pas 62 vjetëve, ky Këshill, përfshin 349
Kisha e bashkësi dhe përfaqëson 560 milion të krishterë. Fillimisht, Kishat themeluese
ishin nga Evropa e nga Amerika e Veriut, ndërsa sot, pjesa më e madhe u përket Afrikës,
Azisë, Amerikës Latine, Lindjes së Mesme e zonës së Paqësorit. Në prag të “Mbledhjes
së ardhshme të nivelit të lartë mbi objektivat e Mijëvjeçarit të Tretë”, që do të
mbahet në Nju Jork nga 20 deri më 22 shtator, Këshilli Botëror i Kishave i ka dërguar
një mesazh Kombeve të Bashkuara, ku theksohet se zhdukja e varfërisë mbetet një objektiv
themelor i kohës dhe se shumë luftra fillojnë pikërisht nga mungesat shoqëroro-ekonomike,
që varfërojnë popullsitë. Këshilli kërkon të rishqyrtohet sistemi pervers i përparësive,
që privilegjon shpëtimin e bankave të mëdha, ose blerjen e armëve, në vend që të çlirojë
popujt nga uria e varfëria. Mungesa e fondeve përdoret si pretekst dhe është shenjë
e mungesës së vlerave e të parimeve morale në favor të jetës, të drejtësisë e të humanizmit,
përfundon mesazhi.