14 жніўня ў супольнасці Ордэна Братоў Меншых распачаўся год св. Максімільяна Кольбэ
14 жніўня Каталіцкі Касцёл адзначае ўспамін св. Максімільяна Кольбэ, святара і мучаніка.
Асаблівую пашану святому аддаюць манахі Ордэна Братоў Меншых, паколькі сам святы Максімільян
быў францішканінам. З нагоды 70-й гадавіны смерці святога 2011 год у супольнасці францішканаў
быў аб’яўлены годам св. Максімільяна Кольбэ. З нагоды распачацця 14 жніўня 2010 г.
года св. Максімільяна з пасланнем да субратоў звярнуўся Генеральны міністр Ордэна
Братоў Меншых брат Марко Таска OFM Conv. У пасланні святар адзначыў, што «нагода 70-годдзя
мучаніцтва св. Максімільяна Кольбэ, яго найвялікшага дару сябе ў канцлагеры ў Асвенціме,
справы вялікай любові, якая паспрыяла таму, што святы атрымаў тытул апекуна нашага
складанага часу, асабліва для нас, браты, з’яўляецца добрай нагодай і адначасова запрашэннем,
каб сабраць яго спадчыну, а таксама прыняць яго і наша прызначэнне». Брат Марко заклікае
францішканаў, а таксама іх паству, каб гэты год стаў адказам на заклік Слугі Божага
кардынала Стэфана Вышынскага: «Не гасіце дух айца Максімільяна». «Шлях да святасці,
які паказвае нам святы Максімільян і да якога заахвочвае сваім заступніцтвам, асноўваецца
на штодзённым прыняцці жыцця, прысвячэнні Пану, наследванні Хрыста, прыняцці свайго
прызначэння з пакорай». Святы Максімільян, жыццё якога было звязана таксама і
з нашаю краінаю, з’яўляецца дадатковым апекуном Гродзенскай дыяцэзіі. Імя святога
носяць шматлікія парафіі нашай краіны. Адной з іх з’яўляецца маладая мінская парафія
Св. Яна Евангеліста і св. Максімільяна Кольбэ. Тут 14 жніўня 2010 г., у суботу, вернікі
святкавалі дзень свайго нябеснага заступніка. Catholic.by