Frytet e një shërbimi të menduar sipas karizmës së Bernardetës së Lurdës: imakolatinet
përfundojnë Kapitullin e përgjithshëm
(12.08.2010 RV)Janë të pranishme në shumë vende të botës e kanë në plan të
hapin bashkësi edhe në zona veçanërisht të varfëra si në Indonezi e në Afrikë. Janë
motrat Imakolatine të Lurdës, të cilat përfunduan dje Kapitullin e tyre të përgjithshëm,
që mbahet çdo 6 vjet. Kongregata e tyre është themeluar mëse 100 vjet më parë, nga
don Françesko Gàtola, meshtar në Napoli të Italisë. Tashmë, motrat janë 250-300, të
shpërndara në Brazil, Kosta Rika, Meksikë, Francë etj. Thirrjet janë të shumta. Që
prej tetë vjetësh, ato janë të pranishme edhe në Lurdë, ku u shërbejnë shtegtarëve
në njëmijë mënyra. Ja ç’na thotë murgesha protagoniste e hapjes së shtëpisë së Imakolatineve
në Lurdë, motër Leonia Amato: Vuajtja, në Lurdë, ndryshon fytyrë. Kam qenë
në Meksikë, kam hapur bashkësinë e murgeshave në Kosta Rika, kam shkuar gjithandej.
Kam parë shumë vuajtje. Por vuajtja në Lurdë ndryshon fytyrë: është më e lehtë të
quhet vuajtje, që i ngjan Jezusit të Ringjallur, më tepër se sa Jezusit të Kryqëzuar.
Të sëmurët vijnë në Lurdë – e thonë ata vetë – për të kërkuar mrekullinë e shërimit.
Pasi kanë shkuar te shpella e janë lutur, ne i pyesim: “A ia kërkuat hirin Zojës?”.
Shumë përgjigjen: “Po motër, pas kaq vuajtjesh i kërkuam hirin t’i shërojë të tjerët!”
Nuk është vuajtje e dëshpëruar, siç shihet jashtë rrethinave të Lurdës. Kjo është
e vërteta!