Përmbytje në Kinë: luftohet për të shpëtuar 1348 vetë
(09.08.2010 RV)Nga Evropa kalojmë në Azi. Ushtria e popullsia janë impenjuar
në kërkimin e të mbijetuarve nga përmbytja e djeshme në një provincë verilindore të
Kinës. Informacioni zyrtar flet për 1348 të zhdukur e 137 të vdekur. Uji mori me vete
rreth 1,8 milion metër kub baltë e mbeturina, që vërshuan mbi tre fshatra të luginës
së Bailongut. Asnjë ndërtesë nuk ka mbetur në këmbë në Juejuan, qindra familje janë
varrosur gjallë, ose janë marrë me vete nga balta. Numri i viktimave dhe i personave
të zhdukur është i destinuar të rritet. 70 të plagosur, 30 prej të cilëve rëndë, ndodhen
në spitalin e kontesë, edhe ky me personel të reduktuar, pasi 10 mjekë nuk dihet se
ku janë.