Papa na fton të lutemi që Kisha të jetë shtëpia e të gjithëve, në veçanti, e atyre
që ikin nga lufta, uria e diskriminimi
“Të lutemi që Kisha të jetë shtëpia e të gjithëve, e gatshme për t’i hapur portat
atyre që, të detyruar nga diskriminimi racor e fetar, nga uria e nga lufta, emigrojnë
në vende të tjera”. Ky është ndjeti misionar i lutjes së Papës për muajin gusht. I
kërkuam një reflektim për këtë atë Xhanromano Njezotos, drejtor i “Fondacionit Migrantes”,
zyrës së Konferencës Ipeshkvnore Italiane për baritorinë e emigrantëve: Emigracioni
është për Kishën shenjë e dukshme e një realiteti të padukshëm, që bën pjesë në vetë
natyrën e Kishës, e cila është popull në ecje. Emigrantët e kuptojnë këtë realitet
të thellë, e dinë se në këtë tokë jemi shtegtarë e vërtet që duhet t’i ngulim këmbët
në tokë, por duke vështruar drejt qiellit, për t’i dhënë vlerë jetës së personave,
nga çdo pikpamje. Emigranti është gjithnjë vëllai ose motra jonë. Vetë Krishti identifikohet
me emigrantin në kapitullin e fundit të Ungjillit sipas Mateut, kur thotë: “Isha i
huaj e më pritët!”. Pa dyshim, të huajt që vijnë në vendin tonë e vënë në diskutim
aftësinë e banorëve për të jetuar sipas vlerave të Ungjillit. Nga ana tjetër, vetë
emigrantët mund të jenë ata, që rinovojnë Kishën e bashkësinë kishtare: katekizmin,
liturgjinë e me kërkesat e tyre të natyrshme, vënë në lëvizje ç'ka më të mirë Kisha
në gjirin e vet. Pra edhe bashkësia katolike mund të bëjë shumë. Nuk u duhet
vënë faji për problemet vetëm institucioneve politike e shoqërore, apo jo? Po,
ndërsa një herë e një kohë misioni ishte të shkonim në vende të largëta për të shpallur
Ungjillin, tani, misioni është këtu. Famullitë duhet të jenë misionare e çdo i krishterë,
që jeton në territorin tonë, duhet të tregojë se është dishepull i Krishtit, në masën
me të cilën vë në zbatim vlerat e solidaritetit, të dialogut, të mirëkuptimit të ndërsjelltë.