Më 7 gusht kalendari Kishtar përkujton Shën Sikstin II papë e shokët e tij, martirë
Sipas Librit të Papëve, Shën Siksti u zgjodh në Selinë e Shën Pjetrit në vitin 257,
pas vdekjes së Papës Shtjefni II. Shën Çipriani, që e quan ‘meshtar i mirë e paqësor’,
tregon, në një letër drejtuar ipeshkvit afrikan Suksesit, persekutimin e vitit 258
pas Ediktit të dytë të Valerianit. Sipas këtij Edikti, ipeshkvijtë, meshtarët e diakonët
dënoheshin me prerjen e kokës, ndërsa Kisha shpronësohej nga çdo pasuri, duke përfshirë
edhe varrezat.
Sipas Papës Damasi, Shën Sikstin e kapën pikërisht në varreza,
ku po kumtonte Fjalën Hyjnore. Ka mundësi që ngjarja të ketë ndodhur në katakombet
e Shën Kalistit, që shërbenin edhe si Kishë e nëndheshme, në atë kohë të rëndë persekutimi.
Papa Siksti ishte i shoqëruar nga shtatë diakonë, kur e arrestuan. Nuk i burgosën,
por ua prenë menjëherë kokat, duke shtuar në radhët e shenjtorëve të Kishës katolike,
shtatë emra të rinj: Siksti, Feliçisimi, Agapito, Gjenaro, Manjo, Vinçenci e Shtjefni.
I teti, Lorenci protodiakon, u mbyt tri ditë më pas në rrugën romake Tiburtina.Siksti
II pushon në paqe në varrezën e Shën Kalistit pranë kriptës së Shën Çeçilies.