(04.08.2010 RV)Presidenti iranian, Ahmadinexhad i shpëtoi një atentati kundër
tij në qytetin e Hamedanit. Fillimisht, lajmi u përgënjeshtrua, por pastaj u konfirmua
nga agjensia filoqeveritare FARS. Kundër makinave, me të cilat po udhëtonte Ahmadinexhad
dhe shpura e tij është hedhur një bombë. Atentatori është arrestuar. Pavarësisht
se atentati nuk është bërë nga Izraeli, apo fuqitë perëndimore për të eliminuar një
lider, që konsiderohet i rrezikshëm, nga shkaku i këmbënguljes në vazhdimin e programit
bërthamor iranian, ky akt është interpretuar nga disa vëzhgues si pasqyrë e opozitës
në vend. Të dëgjojmë pedagogun e gjeopolitikës në Universitetin Katolik të Milanos,
Rikardo Redaeli: Ka shumë opozita.
Para së gjithash, opozitë kundër Ahmadinexhadit, brenda regjimit: janë personazhe
që punojnë brenda kuadrit politik, të elitës politike pas revolucionit. Bëjnë pjesë
në sistemin e Republikës Islamike, por janë kundër linjës së pasdaranëve e të Ahmadinexhadit.
Ekziston pastaj, një opozitë politike e jashtme, jo e dhunshme. Pastaj, kemi fraksione
e grupe, që përdorin edhe dhunën: janë grupet e sunitëve, të lidhur me balukët. Në
jug, vlon fronti kurd dhe azer, megjithëse nuk është i organizuar aq mirë sa juglindja.
Ky është kuadri. Atentatin nuk do ta lidhja me disidencën politike të vitit të fundit,
pas zgjedhjeve, pasi ajo ishte lëvizje paqësore.