Konferencë në Greçi të Italisë, kushtuar ritit bizantin të bashkësive arbëreshe,
në gjirin e Kishës katolike
Riti bizantin në katundin e emigrantëve të hershëm arbëreshë Me
rastin e festimeve për 300-vjetorin e themelimit të Kishës-mëmë të Greçit, kushtuar
Shën Bartolomeut apostull (1710-2010), në qytetin arbëresh të Komunës së Avelinos,
u organizua një konferencë për ritin bizantin. Është një rit i praktikuar në Greçi,
ashtu si edhe në të gjitha ngulimet arbëreshe, gjatë të dy shekujve të parë të emigrimit
nga Shqipëria. Prof. Don Antonio Porpora, i Fakultetit Teologjik të Italisë Jugore
në Napoli në kumtesën e tij kushtuar historisë dhe strukturës së ritit bizantin sqaroi
se Kisha katolike nuk mund tё njëjtёsohet me Kishën latine, siç ndodh shpesh, sepse
përfshin edhe Kishat lindore të ritit bizantin, kopt, etiopian, sirian, armen e maronit. Prirja
për njëjtësimin e Kishës katolike me atë latine është fryt i procesit të latinizimit,
ndërmarrë nga Kisha e Romës e mbështetur me masa e vendime, të frymëzuara nga koncepti
i epërsisë së ritit latin. U desh të mblidhej Koncili II i Vatikanit, për të pohuar
se edhe Kishat e ritit bizantin katolik "gëzojnë të njëjtin dinjitet". Profesor
Porpora u ndal në konceptin e ritit, duke shpjeguar se ritet nuk janë një tërësi
ceremonish kishtare, por "shprehje e një kulture, e një teologjie, e një vizioni të
jetës shpirtërore, janë shprehje e një bashkësie, e historisë së saj; janë, pra, shprehja
e një Kishe, e përshpirtërisë së saj, që gjen shprehjen e vet në liturgji". Parë me
këtë sy, mund të kuptohet më mirë larmia e riteve: nga ai latin, tek ai kopt, siro-perëndimor
e siro-lindor, nga riti armen, tek ai bizantin. Kumtuesi bëri një paraqitje të
karakteristikave të strukturës së ndërtesave kishtare nga pikëpamja arkitektonike,
duke kaluar nga veçoritë e kishave greke (Selanik), frymëzuar nga Bazilika e Kostandinopojës,
tek ato të kishave ruse, me strukturën e tyre të brendshme, e duke nënvizuar vlerën
simbolike të ngjyrave të jashtme të kupolave: e artë, kur kisha i kushtohet Krishtit;
e kaltër, kur i kushtohet Shën Mërisë; e gjelbër, kur i kushtohet Trinisë së Shenjtë
dhe e kuqe, kur i kushtohet shenjtorëve. Profesor Porpora foli edhe për liturgjinë
e për vendin që zë, në shtegtimin shpirtëror gjatë të gjithë cikleve të vitit. Traditat
e hartimit të teksteve liturgjike, që janë të ndryshme, aktualisht kufizohen në tri:
liturgjia e Shën Jakut, e vetmja që kremtohet jashtë ikonostasit; liturgjia e Shën
Vasilit, më e gjata, dhe ajo e Sh. Jan Krizostomit, më e përdorura gjatë gjithë ciklit
të vitit. Eukologji, ose libri i lutjeve liturgjike, gjatë shekujve ka ndjekur zhvillimin
e shumë traditave: atë të Kostandinopojës, atë të murgjërve të Malit të Sinait, të
Italisë së Jugut e atë të Malit Athos. Profesor Italo Kostante Fortino foli për
latinizimin e pjesës më të madhe të komuniteteve arbëreshe. Greçi, katund i formuar
nga emigrantë të hershëm arbëreshë, mbi bazën e një komuniteti ekzistues të ritit
bizantin, kaloi në ritin latin në gjysmën e dytë të shekullit XVII. 2/3 e bashkësive
arbëreshe të ritit bizantin, ashtu si Greçi, kaluan në ritin latin në të njëjtën periudhë:
Portocannone, Montecilfone, Campomarino, Ururi, Casalvecchio, Casalnuovo, Chieuti,
Barile, Ginestra, Maschito, Cerzeto, Cavallerizzo, Cervicati, S. Martino di Finita,
S. Giacomo di Cerzeto, Mongrassano, Rota Greca, S. Caterina Albanese, Falconara Albanese,
S. Lorenzo del Vallo, Spezzano Albanese, Amato, Andali, Caraffa, Gizzeria, Marcedusa
etj. etj. Rreth 65 bashkësi kaluan në ritin latin, ndërsa ato që rezistuan dhe ende
sot ruajnë ritin bizantin, janë 26.
Profesor Fortino kujtoi se arbëreshët,
kur u vendosën në Mbretërinë e Napolit (shek. XV-XVI) praktikonin ritin bizantin dhe
ishin në harmoni të plotë me Kishën latine të Romës, edhe për faktin se Koncili i
Firences (1439) kishte vendosur bashkimin e Kishës Katolike me atë ortodokse. Të
gjitha bashkësitë arbëreshe të Italisë nga pikëpamja kanonike, me marrëveshjen e Patrikut
të Kostandinopojës dhe të Papës së Romës, vareshin nga Patrikana e Ohrit (Maqedoni)
që emëronte një metropolit me seli në Agrixhento (Sicili), dhe me juridiksion mbi
shqiptarët e grekët e ritit bizantin, të vendosur në Itali. Por disa dekada më
pas, me vendimet kufizuese të Koncilit të Trentit (1563), riti bizantin u shkatërrua:
Papa Piu IV, me dokumentin Romanus Pontifex (1564) anuloi të drejtën që iu njoh Ohrit
dhe Kostandinopojës dhe ia nënshtroi komunitetet arbëreshe të ritit bizantin ipeshkvijve
latinë, nisur nga "vullneti për të hequr, ose të paktën për të favorizuar shuarjen
e ritit grek në Itali për shkak shterimi" ashtu siç shkruhet nga pasuesi Papës Piu
V në dokumentin papnor Providentia Romani Pontificis (1566). Vendimet e Koncilit
të Trentit, të zbatuara nga të dy Papët, cituar më lart, krijuan një çarje, që solli,
me kohë, latinizimin e 2/3 të bashkësive arbëreshe të Italisë së Jugut. Koncilet krahinore
të mëvonshme (mjafton të citojmë vetëm atë të Beneventos, 1567 dhe atë të Biznjanit,
1571, duke i shikuar me dyshim praktikat rituale bizantine, favorizuan edhe forma
të latinizimit në brendësi të vetë ritit. Më pas, në 1742, Papa Benedikti XIV
mbështeti epërsinë e ritit latin mbi gjithë të tjerët, duke e vendosur ritin bizantin
në një pozitë të nënshtruar, në krahasim me atë latin. Vendimet e sipërcituara synuan
të fshinin konceptin e Kishës katolike bizantine dhe ta kufizonin vetëm në forma ritualesh
bizantine.Pasi bashkësitë arbëreshe të ritit bizantin morën këtë përmasë të re, Kisha
katolike latine e Romës vazhdoi t’i favorizonte. Edhe ato, që i rezistuan latinizimit.
Papa Gregori XIII themeloi, më 1577 Kolegjin Grek të Romës, ku kishte selinë një ipeshkëv
i emëruar për klerin arbëresh; po kështu në 1732, me ndikimin e familjes Rodotà, Papa
Klementi XII themeloi në Shën Benedikt Ulan Kolegjin "Korsini". Më 1919, Papa Bendedikti
XV krijoi Heparkinë e Ungrës (Lungro) dhe më 1937, Piu IX, do të krijonte atë të Horës
së Arbëreshёve (Piana degli Albanesi). Sinodi i dytë ndërheparkial - Ungra, Hora
e Arbëreshve dhe Manastiri i Grotaferratës, që u mbajt para pak vitesh (2005-2006),
vuri themelet për një organizim më autentik të Kishës katolike bizantine në Itali,
sipas të Drejtës Kanonike të Kishave Katolike Lindore.