Panairi i Librit në Ulqin urë lidhëse mes traditave kulturore të rajonit
Ditë më parë në Ulqin është hapur edicioni i 10-të i Panairit të Librit në Shqip.
Në këtë panair merrnin pjesë ministri i kulturës i Malit të Zi Branisllav Miqunoviq,
ministri i kulturës i Shqipërisë, Xhaferaj e homologu i tij kosovar, Lutfi Haziri.
Ky është viti i dhjetë që organizohet aktiviteti i librit, i cili që atëherë u
promovua nga Shoqata e Botuesve Shqiptarë me mbështetjen e Komunës së Ulqinit dhe
të qeverisë së Malit të Zi. Kjo nismë kulturore po dëshmon se libri mund të fshi
njëherazi edhe barrierat kulturore që mund të kenë ekzistuar më parë mes dy vendeve
fqinje. Tashmë një panair tradicional, që nisi të organizohej në atë kohë kur
Mali i Zi ishte pjesë e ish- Jugosllavisë, ky aktivitet i librit shqip cilësohet si
një faktor që ndihmonte në integrimin e kulturës shqiptare në tërësi. Për ish-kryetarin
e Shoqatës së Botuesve Shqiptarë, Fatmir Toçi, i cili së bashku me kryetarin aktual
të Komunës së Ulqinit, zotin Gëzim Hajdinaga, ministër i Pakicave kur u organizua
panairi e parë, është një ngjarje e veçantë ky jubile, pasi asokohe peripecitë dhe
pengesat ishin shumë të mëdha, përfshi këtu kontrollet e librave me dhjetëra herë,
jo nga policia e Malit të Zi, por nga ushtria e ish-Jugosllavisë. Kryetari i Komunës
Ulqin, Gëzim Hajdinaga u shpreh se ky vit jubilar tregon se tashmë barrierat mes shteteve
janë thyer dhe se Ulqini, si qytet me tradita, tregoi se ka qenë dhe do vazhdojë të
jetë urë lidhëse mes shteteve të rajonit. Ministri i Kulturës në Shqipëri, Ferdinand
Xhaferaj tha se "ky panair tregon se tashmë rajoni është i unifikuar dhe se çdo gjë
që ishte pengesë, është thyer. Kjo mund të shihet më së miri në këtë panair". Ministri
kosovar i Kulturës, Lutfi Haziri u shpreh se "është një kënaqësi e madhe që merr pjesë
në çeljen e panairit duke nderuar ato figura të letrave, të cilët janë udhërrëfyesit
tanë në jetë". Drejtoresha e përgjithshme e Shtëpisë Botuese "Toena", Irena Toçi tha
në fjalën e saj se panairi i këtij viti në Ulqin është i veçantë, pasi sjell tituj
të rinj dhe botues të rinj. Ajo deklaroi se këtë vit ka dërguar në Ulqin veprën e
plotë të shkrimtarit Besnik Mustafaj, i cili është edhe i ftuar nderi në panair. Ndërkaq,
ministri i Kulturës i Malit të Zi Branisllav Miqunoviq u shpreh se ky panair është
treguesi më i mirë që Mali i Zi i ka dyert e hapura për të gjithë qëllimmirët. Janë
mbi 60 botues dhe mbi 3000 tituj të rinj që ekspozohen në këtë panair, ku veç librave
nga Shqipëria, Kosova e Maqedonia, ekspozohen libra e marrin pjesë botues nga Mali
i Zi, Bosnja e pakicat tjera kombëtare të kësaj republike. Kjo është ngjarja më e
rëndësishme kulturore e vitit në Ulqin, e cila tradicionalisht organizohet nga Komuna
e Ulqinit në bashkëpunim me Shoqatën e Botuesve Shqiptarë nga Shqipëria.