Faqe të reja për dy martirë: Don Aleksandër Sirdani e Don Pjetër Çuni.
(30.07.2010 RV)62 vjet më parë kryhej një nga krimet më të shëmtuara të diktaturës
komuniste: mbyteshin për së gjalli në një gropë ujërash të zeza, në Koplik, ku zhvillohej
hetuesia e meshtarëve, dy Martirë të Kishës katolike: Dom Aleksandër Sirdani (1887-1948)
e dom Dedë Çuni (1914-1948). Me që zakonisht shtypi shqiptar hesht në përvjetore
të tilla, ne po i pëkujtojmë me disa faqe të reja, shkruar për ta, duke shfletuar
librin e Fric Radovanit “Një monument nën dhé”1: Don Aleksandër
Sirdani ishte nga Gucia, i datlindjes 1887. Një meshtar i zellshëm dhe i respektuem
nga populli në vendin ku shërbente. Që në rini u dashunue me folklorin e popullit
tonë. Mblodhi një thesar shumë të çmueshëm dhe shumë shpejt u konsiderue si një
ndër njohësit ma të mirë të etnografisë dhe frazeologjisë popullore. Kultura e gjanë
që mori në Insbruk, forcoi edhe ma shumë idealin e tij si atdhetar. Njihte mirë
frymën demokratike, prandej edhe shkroi shumë artikuj ndër revistat ma në za të
kohës. Asht vëllai i At Marin Sirdanit edhe ky dijetar. Don Aleksandri, ishte një
ndër bashkëpuntorët ma të ngushtë të Don Nikoll Gazullit dhe At Donat Kurtit. Kishte
edhe prirje poetike. Vlenë me u theksue se në shpirtin e tij depërtuen thellë njohjet
e ngjarjeve historike të kreshnikëve të Veriut, gja që sollën në letrat e në kulturën shqiptare
një personalitet të kompletuem. Origjina dhe njohjet e zakonëve të malësisë e lidhen
me popullin, nëpërmjet atij virtyti që malësorët e kërkonin edhe në portretin e
priftit, që u predikonte e që ai virtyt thirrej trimni. Nësa ndër rrugët e Shkodrës
shëtitej mbi një gomar prifti 80 vjeçar, Don Ndoc Nikaj, një ndër themeluesit e
Shoqnisë “Bashkimi”(1899) dhe romancieri i parë i letërsisë shqipe, po në vitin 1946
në Koplik, fanatikët komunistë kërkonin me fye figurën e dijetarit Don Aleksandër
Sirdani. Në muejin korrik të vitit 1948, Don Aleksandri u arrestue dhe u mbajt
në hetuesinë famkeqe të Koplikut, ku e torturoi Xhemal Selimi me shokë, të gjithë
të njohtun si kriminelë të pashoq. Don Pjetër Çuni ka lé në Shkodër më 9
gusht 1914. Në moshën 7 vjeç ai ishte në Kolegjin e Jezuitve të Shkodrës, prej
ku shkon në Romë me vazhdue studimet e larta teologjike. Përfundoi studimet në Propaganda
Fide në vitin 1940 dhe po atje, u shugurue meshtar bashkë me 100 xhakoj të tjerë
nga vende të ndryshme të botës nga vetë Papa Piu XII. Mbas shugurimit atje, në
muejn prill, nga qershori vjen në Shqipni dhe ditën e Sh’Palit e Sh’Pjetrit (pra,
ditën e emnit të tij) më 29 qershor, thotë Meshën e parë në Kathedralen e vendlindjes,
në prani të Imz. Gaspër Thaçit, të Imz.Gjergj Volaj, si dhe të gjithë klerit. Ai
ishte nipi i Don Ndre Lufit. Tue cilësue vetëm emnin e dajës së tij, për né që
e kemi njohtë Don Ndreun, e kemi të kjartë se kush ishte ky meshtar i rritun dhe
i pregatitun nën kujdesin e tij. Don Ndreu asht ndër klerikët ma të pastër me qëndrimin
e tij burrnor në hetuesi dhe në burgje. Gjithmonë i papërkulun kundrejt armiqve
të Kishës. Tek Don Pjetri me siguri përveç cilësive të priftit të devoçëm, daja
shihte tek nipi edhe virtytin e vet që e ka karakterizue gjithë jetën, trimin e
mendshëm dhe të vendosun. Këtë e ka provue jeta e të dyve. Emnohet meshtar i Shkrelit
dhe në vitin 1941 asht në Rrjoll. Aty, si të gjithë klerikët, merret me studimet
e zakoneve të krahinës. Boton artikuj në revistën “Kumbona e së Diellës”, me siglën
R.I. (Pjetër Çuni), ku spikat vullneti dhe saktësia në studimin e
folklorit. Ndoshta ky asht edhe shkaku i njohjes me shkencëtarin e asaj fushe Don
Aleksandër Sirdanin, me të cilin edhe martirizohet. Porsa fillojnë vëprimet
kriminale në zonën e Koplikut, vritet trathtisht Don Luigj Pici, më 10 nandor 1946,
vetëm për një deklaratë të bame në favor të Etënve Jezuitë Fausti e Dajani, kundër
vëndimit të gjyqit për pushkatimin e tyne. Vrasja e kryeme nga Asllan Lici dhe
Pal Mëlyshi, atëherë u vesh me motive plaçkitjeje, motive që në të vërtetë edhe
qëndronin, mbasi plaçkitja dhe hajnia ishin gjithnjë të pranishme në vrasjet dhe
arrestimet e komunistëve. Këtë e vërteton vetë fakti i humbjes së pothuej të gjitha
studimeve dhe të veprave shkencore, letrare dhe artistike të intelektualve që janë
vra, arrestue ose kontrollue shtëpitë e tyne. Këtë fat pësuen edhe studimet e Sirdanit
e të Çunit. Me siguri ata janë mbrenda ndonjë titulli të dhanun ma vonë nga Universiteti
i Tiranës, po fakti asht se plaçkitësit mohuen autorët e vërtetë. Brezat e ardhshëm
nuk do ta besojnë ndoshta këtë ngjarje, por unë, po e shkruej i nxitun nga Konica,
që thotë: “Popujt që nuk nderojnë kujtimet e shkuara, janë të dënuar
me vdekje”. SI I MBYTËN DY PRIFTNIT? Mbas vrasjës Don Luigjit, në
vendin e tij u emnue Don Pjetri, i cili ato ditë thonte: “Duket se Krishti ka vendosë
që unë të jem ndër të fundit!...” Në muejin korrik të vitit 1948, kur po vinte
me një biçikletë për në Shkodër, ndalohet në rrugë dhe përcillet në hetuesinë e
Koplikut. Aty (siç më tregonte një ish-polic S. N. i Seksionit të Mbrendshëm),
gjen Don Aleksandrin dhe At Florian Berishën S.J. që masakrohen bashkë me shumë
malësorë. Priftnit torturoheshin ma shumë se të tjerët, thonte ai. Nuk dinte pse,
por jepej një urdhën: “Hyni në hu, edhe po ngordhën mos u frigoni!”. .. Njëditë
… i kanë lidhë dhe i kanë nxjerrë nga një derë anësore. I kanë ba me ecë pak shpejtë
edhe pse ishin mjaft të lodhun nga vuejtja. Ndërkaq u urdhnuen policët me shkue
tek stallat e kuajve dhe me marrë dy cfurqe të rinj dhe të fortë. Urdhni do të
zbatohej por me mend nuk mund të gjindej çka duan me ba xhullinjtë. I sollën edhe
cfurqit. I shtynë, të lidhun, tue u thanë: “Ecni, more klysh të Papës, se tash
do t’ju rregullojmë qejfin tuej, ju kujtoni se na mashtroni me ato zhgarravinat tueja...!
Pse nuk tregoni me cilët kriminela jeni të lidhun dhe u keni çue bukë ndër
male?” Nuk kanë pritë përgjigje por janë drejtue nga një gropë gjirizi
të nevojtorës së Seksionit që ishte gjithmonë e hapun. Kanë urdhnue me afrue priftnit
tek gropa. Këta që po shihnin nga dritarët po mendonin se po u bahej presion me
tregue... por, papritmas tue ua sha Zotin me fjalët ma të flligta veç kur u kanë
dhanë të shtymen të dyve e, kanë ra mbrendë në gropën e zezë. Kur priftnit kanë marrë
me u çue, xhelatët i kanë shty me cfurk për me i zhytë mbrenda, tue u thanë: “Hee...
flisni... ku e keni ate Krishtin tuej... flisni... kështu do të jenë fundi
i priftënve... A po e shihni kund Krishtin tuej, hee pisa pisash...?” Don
Aleksandrit, që ishte zhytë ma parë si duket i ishte marrë fryma dhe nuk po i shihej
fëtyra, ndërsa Don Pjetri ka muejtë me nxjerrë kokën edhe njëherë, ashtu i nxime
si të ishte i lymë me zift prej pisllëkut, ka mbledhë gjithë forcën që i kishte
mbetë dhe ka thirrë: “RRNOFTË KRISHTI... TEK AI PO SHKOJ!...” Mbi brrakën
e gropës së nevojtorës janë pa vetëm kindat e ndyme të dy veladonëve. Fëtyrat nuk
i ka pa ma kush. Xhullinjtë vazhdonin me i shty me cfurk derisa u zhytën mbrendë
edhe trupat e pajetë të tyne. Mbas pak minutash priftnit u mbytën... Ata mendonin
se bashkë me trupat e pajetë do të zhdukët edhe vepra e tyne.... Edhe pse porosia
ishte se kush do të flasë ashtu do ta pësojë, ngjarja e dy priftënve mori dheun.
Dihej martirizimi, por diheshin edhe katilët. Fëtyrat e këtyne kriminelëve kanë
mbetë njësoj si atë ditë kur janë fotografue si “çlirimtarë”, më 29 nandor 1944,
tue parakalue në Fushën e Çelës së qytetit të Shkodrës. Shqipnia asht shumë
e vogël për krime kaq të mëdha. Ka vende shumë ma të mëdha, që edhe ata kanë vuejt
nën thundrën gjakatare komuniste, por krimet atje nuk janë kurrë në përmasat tona. Historia
do të flasë njëditë! Po, kur? - Atë nuk e di! 1
Fritz Radovani - de Angeliis, “Një monument nën dhé”, fq 150-153, M e l b o
u r n e 2 o o 4; Biblioteka “Imzot Lazër Mjeda”, Libri 14; Boton Misioni Katolik
Shqiptar në Kroaci.