Выйшаў чацверты нумар літаратурнага бюлетэня “Кніганоша”. У рубрыцы
“Аўтограф” увазе чытачоў прадстаўлена гутарка з вядомым беларускім філосафам, паэтам
і літаратурным крытыкам Валянцінам Акудовічам, чый юбілей незвычайным чынам адсвяткавалі
прыхільнікі яго творчасці ў чэрвені. Пра тое, ці можна нарадзіцца пісьменнікам, пра
свой шлях да жанру эсэ, а таксама пра новую кніжную серыю выдавецтва “Логвінаў” распавядае
ў сваім інтэрв’ю В. Акудовіч. Сярод больш, чым 30 кніг, пра якія вядзецца гаворка
на старонках бюлетэня, аматары добрага чытва знойдуць анатацыі, як на кніжныя навінкі
гэтага году (“Папулярная музыка з Вітулы” Мікаэля Ніэмі, Выбраныя творы Казіміра Сваяка,
“Яська і конік ягоны Грыўка” Юрыя Усціновіча, “Лісты да запатрабавання” Генадзя Бураўкіна
і інш.), так і на літаратурныя творы, якія ў той ці іншай ступені ўжо знайшлі свой
шлях да чытача (“Беларускія Александрыя, Троя, Трышчан ”, двухтомнік твораў Збігнева
Герберта, “Рыцары і дойліды Гародні” Алеся Краўцэвіча, альманах “Асоба і час” і інш.). Гэтым
разам у рубрыцы “Погляд” чытачы маюць магчымасць азнаёміцца з артыкуламі пра новую
кнігу Сяргея Астраўца “Каты Ёзафа Ратцынгера: апавяданні, эсэ, рэпартажы з Горадні”,
а таксама “Трыццаць тэкстаў“ Дзмітрыя Плакса.