26 ліпеня 2010 г. у Івянцы распачалася «Музычная майстэрня», якая ў гэтым годзе
праводзіцца ўжо ў восьмы раз. «Майстэрня» з’яўляецца асноваю Малітоўнай сустрэчы моладзі,
што будзе праходзіць тут 30 ліпеня–1 жніўня. Удзельнікі «Майстэрні» ўтвараюць хор,
які адказвае за супольны спеў і малітву падчас сустрэчы. Мэта «Майстэрні» — не
толькі вучыцца спяваць, але і атрымаць вопыт супольнага спеву як праслаўлення Бога,
каб такім чынам ажыўляць і ўзбагачаць жыццё сваёй парафіі. Ініцыятыва правядзення
«Майстэрні» належыць польскім цэнтрам рэлігійнай музыкі, якія такім чынам прагнуць
падзяліцца сваім жаданнем праслаўляць Бога праз спеў і літургію, а таксама заахвоціць
да больш глыбокага яе перажывання. З нашай краіны ў Івянец ужо прыбылі 288 чалавек,
21 удзельнік прыехаў з Польшчы. Чакаюцца яшчэ госці ў бліжэйшыя дні. Акрамя святых
Імшаў, катэхезаў, начнога чування і канцэртаў, якімі ўдзельнікаў парадуе «Музычная
майстэрня», у Івянцы адбудуцца таксама разнастайныя майстар-класы — тэатральны, дырыжорскі,
ударных і смычковых музычных інструментаў. Будуць гучаць літургічныя спевы і спевы
праслаўлення.