Արամ Ա. Կաթողիկոս ընդունեց Իրանի Հանրապետութեան դեսպանատան մշակութային կցորդը:
Երկուշաբթի 26 Յուլիս 2010-ին, Պիքֆայայի Ս. Աստուածածին Վանքի Հայրապետական ամարանոցին
մէջ, Արամ Ա. Կաթողիկոս ընդունեց Իրանի Իսլամական Հանրապետութեան դեսպանատան մշակութային
կցորդը: Իր օգնականներուն հետ Վեհափառ Հայրապետին ներկայանալով, Մուհամմէտ Հիւսյէն Զատէ
Իրանի փոխ-նախագահէն պաշտօնական նամակ յանձնեց Նորին Սրբութեան, ուր յանուն Կրօններու
ու Մշակոյթներու Երկխօսութեան կեդրոնին ու պետութեան, հրաւէր կը տրուէր Նորին Սրբութեան,
պաշտօնական այցելութիւն տալու Իրան:
Հանդիպման ընթացքին խօսակցութեան նիւթ դարձաւ
երկու ամիսներ առաջ Անթիլիասի մէջ կայացած պաշտօնական երկխօսութեան չորրորդ նիստը, Իրանի
Իսլամական Հանրապետութեան ու Մեծի Տանն Կիլիկիոյ Կաթողիկոսութեան միջեւ:
Նորին
Սրբութիւնը այս առիթով դարձեալ շեշտեց Քրիստոնեայ-Իսլամ երկխօսութեան կարեւորութիւնը,
որ յատկապէս Միջին Արեւելքի մէջ իր դրական արդիւնքը պիտի ունենայ, գոյակցութենէ գործակցութիւն
առաջնորդելով երկու կրօններն իրենց հետեւորդներով: