Ministrat e jashtëm evropianë mblidhen për Kosovën
(26.07.2010 RV)Ministrat e jashtëm të Bashkimit Evropian diskutuan sot për
Kosovën në mbledhjen e radhës në Bruksel. Qëllimi i Komisionit Evropian është përcaktimi
i strategjisë për integrimin e Serbisë dhe të Kosovës, pas vendimit të Gjykatës ndërkombëtare
të Drejtësisë, e cila deklaroi javën e kaluar se me shpalljen e njëanshme të pavarësisë,
Prishtina nuk ka shkelur asnjë ligj ndërkombëtar. Ministrat e jashtëm morën parasysh
edhe pasojat, që mund të ketë një vendim i tillë, për raste të tjera të ngjashme nëpër
botë, duke përsëritur se ai i Kosovës është rast unik. Ndërkaq, të dyja shtetet
kanë filluar aktivitetin diplomatik: Kosova për t’u njohur nga sa më shumë shtete,
Serbia për ta penguar këtë njohje. Siç deklaroi këto ditë, ministri i jashtëm serb
Vuk Jeremiç, Beogradi do të nisë një letër në 55 vende, që akoma nuk e kanë njohur
Kosovën, në përpjekjen për t’i bindur të mos e bëjnë këtë hap. Por edhe qeveria e
Prishtinës u ka dërguar mesazhe krerëve të 121 shteteve, me ftesën për njohjen e pavarësisë
së vendit. Jo rastësisht, të nesërmen e shpalljes së vendimit të Gjykatës së Drejtësisë,
autoritetet kosovare deshën t’i tregojnë botës se duan ta luftojnë korrupsionin, duke
arrestuar guvernatorin e Bankës Qendrore, Hashim Rexhepi. Por për një koment, pas
vendimit mbi ligjshmërinë e pavarësisë, të dëgjojmë, në mikrofonin e don David Gjugjës,
profesorin e Shkencave Politike dhe të së Drejtës Ndërkombëtare në Universitetin e
Prishtinës, Afrim Hoti