Ipeshkvi imzot Dodë Gjergji përshëndet vendimin e GJND-së që sanksionon pavarësinë
e Kosovës.
Menjëherë pas shpalljes së parimit të GJND-së mbi ligjshmërinë e shpalljes së pavarësisë
së Kosovës, ipeshkvi katolikë i Kosovë imzot Dodë Gjergji shprehi vlerësimin e tij
pozitiv duke e konsideruar këtë akt të GJND-së si miratim të mëtejshëm e përfundimtar
të ngjarjes historike të shpalljes së Pavarësisë së Kosovës më 17 shkurt 2008 dhe
përurim të një periudhe të re të historisë së shtetit më të ri demokratik të Evropës.
Ja deklarata e ipeshkvit të Kosovës imzot Dodë Gjergjit me shkrim dhe me goje..
Prishtinë, 23.07.2010
Deklaratë
e ipeshkvit të Kosovës
Ipeshkvia e Kosovës, në krye me Ipeshkvijtë e vet,
përherë ka mbështetur synimet e popullit dhe me një kujdes të veçantë ka përcjellë
gjitha ngjarjet duke dëshmuar para faktorëve të jashtëm se populli i Kosovës është
i vuajtur dhe paqedashës, prandaj ka të drejtë të ketë të gjitha të drejtat dhe liritë
që i gëzojnë popujt e qytetëruar. Njëkohësisht jemi përpjekur, me të gjithë faktorët
relevantë brenda vendit, që të ruhen vlerat universale njerëzore dhe ashtu siç jemi
përpjekur t’i mbrojmë të drejtat dhe liritë tona, duhet angazhuar për të mos cenuar
të drejtat dhe liritë e të tjerëve rreth nesh. Ne përgëzojmë të gjithë qytetarët
e Kosovës që në situata shumë të vështira dhe në rrethana të pavolitshme, nëpërmjet
përfaqësuesve të vet legjitim, kanë arrit të shtyjnë para proceset pozitive deri te
akti final i shpalljes së Pavarësisë, duke u mbështetur mbi të drejtën dhe drejtësinë.
Ndihemi të lumtur që ne, Kishë katolike në Kosovë, ishim dhe jemi pjesë e këtyre
proceseve të rëndësishme sidomos me lutjet tona të përditshme dhe me angazhimin tonë
pa rezervë për paqe, pajtim dhe drejtësi për të gjithë njerëzit në Kosovë. Mendimi
këshillëdhënës që dje e publikoi Gjykata Ndërkombëtare e Drejtësisë ishte një dëshmi
që, e drejta e popullit tonë për të jetuar i lirë dhe i pavarur në shtetin e Kosovës,
është një e drejtë legjitime e popullit të saj, kjo e drejtë nuk e cenon të drejtën
universale të familjes së popujve të botës. Me këtë rast, si ipeshkëv dhe bari
i grigjës, ftoj të gjithë njerëzit në Kosovë që të vazhdojnë të jetojnë në paqe,
duke u angazhuar edhe më tutje për të siguruar bashkëjetesë në paqe, drejtësi dhe
angazhim për të ndërtuar, edhe më tutje, të ardhmen tonë të mbështetur në të drejtën
dhe drejtësinë. Lus Zotin, që shtetet të cilat akoma nuk e kanë konfirmuar njohjen
e Shtetit të Kosovës, ta bëjnë një gjë të tillë sa më parë që të jetë e mundur, sepse
sa më parë të përfundojnë kontestimet në këtë hapësirë të Evropës, aq më parë do
të krijohen kushtet për paqe të qëndrueshme, pajtim mes popujve dhe bashkimi i tyre
në Familjen Evropiane. + Dodë GJERGJI Ipeshkëv