Kardinali Bertone: “Nga Kryqi buron forcë për njerëzimin”.
(19.07.2010 RV)“Nga Kryqi buron forcë e përhershme për njerëzimin”. Këtë nënvizoi
sekretari i Shtetit të Vatikanit, kardinali Bertone, gjatë homelisë, mbajtur në Sordevolo,
në provincën italiane të Bielës, me rastin e edicionit 2010 të shfaqjes kishtare kushtuar
Mundimeve të Krishtit. Shfaqje e pashembullt, organizuar nga Teatri Popullor i Sordevolos,
që përsëritet çdo pesë vjet në këto troje, duke nisur nga viti 1816. Rreth 400 nga
një mijë e treqind banorët e bielezes janë aktorët e kësaj shfaqjeje, gjatë së cilës
rijetojnë, në formën e teatrit popullor, ngjarjen që ndau më dysh epokat: Mundimet
e Krishtit. Në homelinë, mbajtur në Meshën e kryesuar gjatë këtij takimi të madh,
kardinali Bertone nënvizoi se shfaqja të rikujton fjalët e Papës para Sindonës “Passio
Christi, passio hominis”, duke kujtuar se njeriu jeton, sepse mund të dojë e të duhet.
E, duke shpjeguar Ungjillin e së dielës, me kundrimin e Marisë e punët e Martës, theksoi
se të dyja sjelljet janë pozitive, por secila kërkon masën e kohën e vet. Në se duam
ta jetojmë jetën tonë me fund, shpjegoi kardinali, duhet të ndjekim Marinë, në kundrim,
e Martën në punët e përditshme, pa të cilat nuk mund të jetohet. Nga njëra anë, kjo
do të thotë të rrish te këmbët e Jezusit, ta kundrosh, në sa na shpjegon sekretin
e të gjitha gjërave; nga ana tjetër, të përpiqesh edhe për ta pritur mikun, me nderimet
që i përkasin.