Ipeshkvijtë BE-së: së bashku, në luftë kundër varfërisë
Në Pallatin e Komisionit Evropian të Brukselit, Kishat e krishtera të Evropës u takuan
këto ditë me një delegacion të Komisionit evropian e të qeverisë belge, që ka presidencën
gjashtëmujore të Bashkmit. Takimin e organizuan institucionet e Koordinimit Kishtar,
Komisioni ‘Kisha e Shoqëria’ dhe Konferenca e Kishave Evropiane (Csc dhe Kek) ndërsa,
për Kishën katolike, Komisioni i Episkopateve të Bashkimit Evropian (Comece). Komisioni
Evropian përfaqësohej nga komisioneri për punën e çështjet shoqërore, Laslo Andor,
i shoqëruar nga një delegacion i përgjegjësve të sektorit shoqëror pranë Komisionit
në fjalë. Në qendër të vëmendjes, përpjekja për ta thelluar impenjimin e kishave
në luftë kundër varfërisë e përjashtimit të njerëzve nga radhët e shoqërisë. U vu
në dukje se përgjegjësitë e institucioneve shtetërore ndryshojnë nga ato të kishave,
por kjo nuk e përjashton aspak mundësinë e bashkëpunimit të ngushtë, me një synim
të përbashkët: ndërtimin e një shoqërie më të drejtë, ku ka më pak varfëri, më shumë
rend e ku vihen në plan të parë vlerat e vërteta etike e civile.