Më 15 korrik kalendari Kishtar përkujton Shën Bonaventurën, ipeshkëv e doktor i Kishës
Bonaventura lindi më 1217 në Banjoregjo në provincën e Viterbos, u bë frat, gjeneral
i Urdhrit e pastaj kardinal e ipeshkëv i Albanos. Vdiq më 1274 gjatë Koncilit II të
Lionit në Francë. Njihet si një nga teologët më të mëdhenj të Kishës katolike. Por
mbi ç’ baza ngrihet teologjia e tij?
Bonaventura është teolog me shpirt thellësisht
mistik. Për të gjithçka është në shërbim të thellimit të përvojës të jetës së fesë.
Është shpirt françeskan, që e shikon Zotin si vlerën më të lartë për njeriun, sepse
njeriu vjen nga Zoti e duhet të kthehet tek Zoti, përmes ndërmjetësimit të Fjalës
së mishëruar e të kryqëzuar. E ai, Bonaventura, e jeton thellësisht përvojën mistike
si bashkim kundrues plot dashuri me Zotin, e mira më e Lartë, që e bën të jetojë qysh
në tokë përvojën e bashkimit intim me Hyjin, e cila provohet vetëm në Parajsë.
Shën
Bonaventura ka thënë: “Nuk mjafton studimi - pa mrekullinë, s’mjafton shkenca - pa
dashurinë e krishterë, e s’mjafton mençuria - pa përvujtërinë”. U shpreh kështu
me vetëdijen e plotë se i gjithë misteri i përvojës së krishterë është dhuratë që
vjen nga Zoti, është dhuratë e Shpirtit Shenjt e se nisma është e Zotit. Gjithçka
jemi vjen nga Zoti, i cili pret që ne ta lemë vetën në duart e tij, në vullnetin e
tij e të marrim pjesë në nismën hyjnore.
"Të krishterët të mësojnë nga
Shën Bonaventura" Shën Bonaventura, qe dishepull i denjë të Shën Françeskut,
reliket e tij ruhen në qytetin Banjorexho, ku ekziston edhe një Qendër Studimesh Bonaventuriane,
ndërsa personalitetin e këtij shenjti të madh mund ta përshkruajmë me tri cilësi kryesore,: Shën
Bonaventura ishte, në radhë të parë, një kërkues i palodhur i Zotit, që kur kryente
studimet në Paris, e vazhdoi të jetë deri në vdekje. Në shkrimet e tij tregon rrugën
që duhet përshkuar: “Meqë Zoti është lart – shkruan Bonaventuar – është e nevojshme
që mendja të lartohet deri te Ai me të gjitha forcat”… Shën Bonaventura qe edhe
këngëtar serafik i krijimit, që pas gjurmëve të Shën Françeskut, mësoi si “të lëvdojë
Zotin në të gjitha krijesat e përmes tyre”… Sa do të ishte e nevojshme, që edhe sot
të rizbulohej bukuria e vlera e universit të krijuar, në dritën e mirësisë e të bukurive
hyjnore!... Shën Bonaventura, së treti, ishte lajmëtar i shpresës… Kush shpreson
– pohon ai - “duhet të ngrejë kryet, duke i drejtuar lart mendimet, drejt lartësive
të qenies sonë, pra, drejt Zotit. Prandaj duket të mësojnë nga ky Doktor i madh
i Kishës për të thelluar dijen e rrënjosur në Krishtin.
Ta bëjmë tonën trashëgiminë,
që na la ky Dijetar i shquar i Kishës, i cili na kujton domethënien e jetës, me fjalët:
“Mbi tokë… mund ta kundrojmë pafundësinë hyjnore përmes arsyetimit e admirimit; ndërsa
në atdheun qiellor, përmes vegimit, kur të bëhemi të ngjashëm me Zotin, e përmes ekstazës..
do të hyjmë në galdimin e Hyjit. Këtë na kujton teologu i madh françeskan në ditën
e festës së tij. ***** Papa Benedikti XVI: jetëshkrim i
shkurtër i Shën Bonaventurës. (03.03.2010 RV)Lindur, ndoshta, në vitin
1217 e vdekur më 1274, ai jetoi në shekullin XII, epokë në të cilën feja e krishterë,
që kishte depërtuar thellësisht në kulturën e në shoqërinë e Evropës, frymëzoi shumë
vepra të pavdekshme në lëmin e letërsisë, të arteve pamore, të filozofisë e të teologjisë.
Ndërmjet figurave të mëdha të krishtrea, që dhanë ndihmesë të shquar në krijimin e
harmonisë ndërmjet fesë e kulturës, mund të kujtojmë pikërisht Shën Bonaventurën,
njeri i veprimit e i kundrimit, i përshpirtërisë e i qeverisjes së urtë. U pagëzua
me emrin Gjovani Fidanca të cilin, kur veshi zhgunin françeskan, e ndërroi me emrin
Bonaventuara. Studioi në një shkollë të njohur të Parisit, ku mori titullin ‘Mjeshtër
i Arteve’, të cilin mund ta krahasojmë me dëftesën e liceve më të shquara të kohëve
tona. Si shumë të rinj të kohës së tij, e edhe të kohës sonë, Gjoni nisi t’i bëjë
vetes një pyetje themelore: “Ç’duhet të bëj në jetë?” I mahnitur nga dëshmia ungjillore
e Fretërve të Vegjël, që kishin arritur në Paris, trokiti në portën e Kuvendit françeskan
të qytetit e kërkoi të pranohej në gjirin e familjes së bijve të Shën Françeskut. Rreth
vitit 1243 veshi zhgunin e mori emrin Bonaventura. Vijoi me zell të ri studimet, duke
ndjekur fakultetin e Teologjisë në Universitetin e Parisit, e njëkohësisht, edhe shumë
kurse impenjative, të domosdoshme për karrierën akademike. Studioi thellësisht Shkrimin
Shenjt, Sentencat e Pietro Lombardit, Doracakun e teologjisë së kohës, autorët më
të rëndësishëm të teologjisë e, duke u takuar vazhdimisht me mësues e studentë të
teologjisë, që vinin në Paris, arriti të fitojë pjekuri e ndjeshmëri të thellë shpirtërore
personale, me vlerë të madhe. E kështu u bë një nga teologët më të rëndësishëm të
historisë së Kishës. Na la trashëgim veprat:Breviloquium (Hyrje në teologjinë
skolastike) Collationes de decem praeceptis (Përmbledhje për dhjetë Urdhërimet
e Tënzot) Collationes de septem donis Spiritus Sanctis (Përmbledhje për shtatë
dhantitë e Shpirtit Shenjt) Collationes in Hexaemeron (Përmbledhje në Gjashtë Ditët
e Krijimit ) Commentaria in quattuor libros sententiarum Magistri Petri Lombardi
(Koment i katër librave të sentencave të mjeshtrit Pietro Lombardi) De mysterio
Trinitatis (Misteri i Trinisë Shenjte: çështje shumë të debatuara) De perfectione
vitae ad sorores (Përsosuria e jetës për motrat) De reductione artium ad theologiam
(Shikim i arteve përmes teologjisë) De Regno Dei descripto in parabolis evangelicis
(Mbretëria e Zotit përshkruar në shembëlltyra ungjillore) De scientia Christi et
mysterio Trinitatis (Njohja e Krishtit dhe misteri i Trinisë) De sex alis Seraphin
(Gjashtë flatrat e Serafinëve) De triplici via (Udha e trifishtë) Itineriarium
mentis in Deum (Shtegtim i mendjes në Zotin) Legenda Sancti Francisci (Gojëdhëna
e Shën Françskut) Lignum vitae (Druri i jetës) Officium de passione Domini (Detyrat
që kanë të bëjnë me Mundimet e Zotit) Quaestiones de perfectione evangelica (Çështje
mbi persosurinë ungjillore) Summa theologiae (Përmbledhje e teologjisë) Vitis
mystica (Jetë mistike)
Ta bëjmë tonën trashëgiminë, që na la ky Dijetar
i shquar i Kishës, i cili na kujton domethënien e jetës, me fjalët: “Mbi tokë… mund
ta kundrojmë pafundësinë hyjnore përmes arsyetimit e admirimit; ndërsa në atdheun
qiellor, përmes vegimit, kur të bëhemi të ngjashëm me Zotin, e përmes ekstazës.. do
të hyjmë në galdimin e Hyjit”(Njohja e Krishtit).
Benedikti XVI për Shën
Bonaventurën: Kisha ndjek idealin e tij të pastërtisë, të varfërisë e të bindjes,
duke harmonizuar fenë me kulturën. (03.03.2010 RV)Kisha le ta bëjë të
vetin stilin e një jete të pastër, të varfër, të bindur: këtë pohoi Benedikti XVI
në audiencën e të përgjithshme të 3 marsit 2010, mbajtur në Sallën e Palit VI, në
Vatikan, përballë tetë mijë besimtarëve. Papa ia kushtoi katekizmin Shën Bonaventurës
së Banjorexhos, doktor i Kishës, që arriti të harmonizonte përshpirtërinë françeskane
me reflektimin teologjik. Në çastin e përshëndetjeve, Ati i Shenjtë kujtoi figurën
e Shopenit, kur mbarë bota përkujton dyqindvjetorin e lindjes së kompozitorit të madh
polak, që njihet si ‘Poeti i pianos’. Kishave u kujtoi se duhet të impenjohen gjithnjë
më shumë në ndihmë të ciganëve. “Njeri i mirë, i ëmbël, i përshpirtshëm e i mëshirshëm,
përplot me virtyte, i dashur nga Zoti e nga njeriu”: Benedikti XVI mori hua fjalët
e një lëvdate të lashtë papnore, për të pikturuar me të portretin e Shën Bonaventurës
nga Banjorexho. Njeri i veprimit e i kundrimit – nënvizoi Benedikti XVI - ai dha një
kontribut tejet të çmuar për krijimin e harmonisë ndërmjet fesë e kulturës. Më pas
Papa përmendi shtegtimin e tij në Banjorexho e u kujtoi besimtarëve të pranishëm në
audiencë se që në rini kishte ushqyer një dashuri të posaçme për Shenjtin teolog: “Ju
rrëfej se, duke e paraqitur këtë argument, provoj një farë nostalgjie, sepse më vijnë
përsëri në mend kërkimet e rinisë, pikërisht mbi këtë autor, të cilin e kam dashur
gjithnjë në mënyrë të veçantë. Njohja e tij ka ndikuar jo pak në formimin tim”. Benedikti
XVI përshkroi shkurtimisht jetën e dijetarit të madh, me emrin rregulltar Bonaventura,
në pagëzim, Gjovani da Fidanca. Një ngjarje, që i ndodhi kur ishte ende fëmijë – vijoi
të tregonte Papa - i la gjurmë aq të thella, sa t’ia ndryshonte krejt rrjedhën e jetës.
U sëmur rëndë e, në prag të vdekjes, u rikthye në jetë falë Shën Françeskut të Asizit,
të cilit e ëma i kishte kërkuar të ndërmjetësonte për shpëtimin e të birit. Gjoni
do të tregonte, më vonë, se kur u njoh me françeskanët, mbeti aq i mahnitur nga jeta
thellësisht ungjillore e vëllezërve të vegjël, sa të ndjente thirrjen e pakundërshtueshme
për të hyrë në familjen e madhe të dishepujve të Shën Françeskut. Ati i Shenjtë kujtoi
fjalët e vetë Shën Bonaventurës për arsyet që e shtynë të zgjidhte këtë rrugë: “Shkruan
kështu, në një letër drejtuar një vëllau tjetër: “Rrëfej para Zotit se arsyeja, që
më bëri ta dua më shumë jetën e të lumit Françesk, është se ajo i ngjet zanafillës
e rritjes së Kishës. Kisha zuri fill me ca peshkatarë të thjeshtë, e në vijim, u pasurua
me dijetarë të ndritur e të urtë; feja e të lumit Françesk nuk buroi nga maturia njerëzore,
por nga Krishti”.Në vitin 1243 Gjoni veshi zhgunin françeskan e mori emrin Bonaventura.
Nisi, kështu, në Paris, edhe studimet e teologjisë. Gjatë studimeve, arriti të fitojë
pjekuri e ndjeshmëri të thellë shpirtërore, me vlerë të madhe, e kështu - vijoi Papa
- arriti të bëhej një nga teologët më të rëndësishëm të historisë së Kishës. Më pas
Benedikti XVI u ndalua posaçërisht tek puna e diplomës, që mbrojti Shenjti françeskan,
për të marrë titullin e teologut. Titullohej: “Çështje mbi njohjen e Krishtit”: “Ky
argument flet vetë për rolin qëndror, që pati gjithnjë Krishti në jetën e në mësimin
e Shën Bonaventurës. Mund të themi, pa asnjë dyshim, se gjithë mendimi i tij ishte
thellësisht kristocentrik”. Në vitet kur Shën Bonaventura ndodhej në Paris – vijoi
të kujtonte Papa – vihej në dyshim jo vetëm vlera e mësimdhënies së françeskanëve
e domenikanëve në universitete, por edhe vetë vërtetësia e jetës së tyre rregulltare.
E kjo – reflektoi Ati i Shenjtë – për shkak se ndryshimet që sollën Urdhërat e Lypësve
në mënyrën e kuptimit të jetës rregulltare, ishin aq të reja, sa jo të gjithë arrinin
t’i kuptonin. Kësaj, pastaj, duhet t’i shtojmë edhe zilinë e smirën, ligështi që nuk
mungojnë as në jetën e rregulltarëve. Bonaventura u mor me këtë çështje në veprën
e tij “Përsosuria ungjillore”, në të cilën dëshmon se Urdhërat e Lypsëve, duke vënë
në jetë kushtin e varfërisë, të pastërtisë e të bindjes, ndiqnin këshillat e vetë
Ungjillit. E ky është një mësim gjithnjë aktual: “Kisha u bë më e ndritur e më
e bukur përmes besnikërisë së këtyre bijve e bijave të veta, të cilët jo vetëm që
vunë në jetë mësimet ungjillore por, me hir të Zotit, janë të thirrur t’i respektojnë
këshillat e të dëshmojnë kështu, me stilin e jetës së tyre të varfër, të pastër e
të nënshtruar, se Ungjlli është burim gëzimi e përsosurie”. Shën Bonaventura do
të ishte, për 17 vjet me radhë, edhe epror i përgjithshëm i Urdhërit të Fretërve të
Vegjël. E këtë detyrë e kreu me urti e përkushtim, por edhe me rreptësi, kur ishte
fjala për t’iu kundërvënë shpërdorimeve. Për të shmangur rrezikun e përçarjes brenda
Urdhërit, shkroi një tekst për njëjtësimin e normave, që rregullonin jetën e përditshme
të fretërve të vegjël”: “Bonaventura e kuptoi se urdhërat, edhe kur janë të frymëzuar
e të matur, nuk mjaftojnë për të siguruar bashkimin e shpirtrave e të zemrave. Zemrat
e shpirtrat bëhen një, vetëm kur kanë të njëjtat ideale”. Për këtë arsye Bonaventura
deshi të paraqesë karizmën e vërtetë të Shën Françeskut, jetën e mësimin e tij. Dëgjoi,
prandaj, me vëmendje të madhe, kujtimet e atyre, që e kishin njohur drejtpërdrejt
Françeskun. Lindi, kështu, jetëshkrimi i Shenjtit të Asizit. Ja edhe portreti i Shën
Françeskut, dalë nga zemra e nga penda e birit të tij të devoçëm e pasardhësit të
tij, Shën Bonaventurës: “Françesku është një Krisht tjetër, një njeri, që e kërkoi
me pasion Krishtin. Përmes dashurisë, që të shtyn drejt përngjasimit, ai u bë plotësisht
një me Të”. Bonaventura i ftonte të gjithë ithtarët e Françeskut të ndiqnin këtë ideal
të gjallë. E ky ideal, me vlerë për çdo të krishterë, dje, sot e përgjithmonë, është
edhe programi i Kishës së mijëvjeçarit të tretë, përvijuar nga Paraardhësi im i nderuar,
Gjon Pali II”. Është një program, që ka në qendër vetë Krishtin, për ta njohur,
për ta dashur, për ta imituar, për të jetuar në Të jetën trinitare e për ta shndërruar,
me Të, historinë, deri në përkryerjen e saj, deri tek Jeruzalemi qiellor. Në çastin
e përshëndetjeve, duke u folur shtegtarëve të ardhur nga Polonia, Benedikti XVI kujtoi
kompozitorin e famshëm polak, Frederik Shopen, në dyqindvjetorin e lindjes, që po
kremtohet në mbarë botën. Papa pianist uroi që muzika e kompozitorit, i cili solli
një kontribut të madh në kulturën evropiane e në botë, t’i afrojë ata, që e dëgjojnë,
tek Zoti e t’i ndihmojë të zbulojnë thellësitë e pamata të shpirtit njerëzor. Më
pas, duke u folur shtegtarëve italianë, përshëndeti posaçërisht pjesëmarrësit në takimin,
që po mbahet në Vatikan, kushtuar punës baritore me ciganët. Papa uroi që Kishat vendase
të punojnë së bashku me zell e dashuri në ndihmë të ciganëve. Papa në audiencën
e përgjithshme: Zoti nuk njihet vetëm me arsye, por me forcën e dashurisë. (17.03.2010
RV)Më 17 mars 2010 paradite Papa e mbajti audiencën e përgjithshme, për herë të
parë këtë vit, në Sheshin e Shën Pjetrit në Vatikan, ndriçuar nga dielli i ëmbël i
fillimit të pranverës, mbas ditëve të gjata me reshje. Në qendër të katekizmit, përsëri
figura e Shën Bonaventurës së Banjorexhos dhe arritjet e tij në shkencën teologjike,
të krahasuara sot me veprën e Shën Tomës së Akuinit. Shën Toma e Shën Bonaventura
– tha Papa – e përkufizojnë në mënyra të ndryshme cakun e fundmë të njeriut, lumturinë
e tij të plotë. Parë në këtë këndvështrim, mund të themi se kategoria më e lartë për
Shën Tomën është e vërteta, ndërsa për Shën Bonaventurën, e mira. Do të ishte gabim
të mendonim se këto dy përgjigje i kundërvihen njëra-tjetrës. Në të dyja rastet, e
vërteta është edhe e mirë; ndërsa e mira, është njëkohësisht edhe e vërtetë; të shikosh
Zotin, do të thotë ta duash, e ta duash, do të thotë ta shikosh. Kemi të bëjmë me
theksime të ndryshme të një vizioni, në themel të përbashkët. Të dy këto theksime
formuan tradita e përshpirtëri të ndryshme e kështu dëshmuan fekonditetin e fesë,
që është një, në larminë e shprehjeve të saj të ndryshme.
Jeta e krishterë
është një shkallë drejt Zotit. Kështu e perceptonte, 800 vjet më parë Shën Bonaventura
nga Banjorexho. Një ngjitje ‘drejt lartësive të Hyjit’, që mund të kryhet me forcën
e arsyes e të kërkimit shkencor teologjik deri në një farë pike, përtej së cilës mund
të ngjitesh vetëm përmes dritës së dashurisë. E pikërisht aftësitë dhe kufizimet e
teologjisë theksoi Benedikti XVI në katekizmin e audiencës së sotme, duke vënë ballë
për ballë bindjet e Shën Bonaventurës nga Banjorexho me ato të Shën Tomës së Akuinit
në fushën e teologjisë, e cila mund të jetë spekulative, domethënë mund të na çojë
në radhë të parë tek njohja e Zotit, ose praktike, domethënë mund të na çojë drejt
së mirës. Papa shprehu mendimin se: “Për Shën Tomën qëllimi më i lartë, drejt të
cilit shkon dëshira jonë, është të shohim Zotin. Në këtë akt të thjeshtë të pamjes
së Zotit, gjejnë zgjidhjen të gjitha problemet: arrijmë lumturinë, nuk kemi më nevojë
për asgjë tjetër. Ndërsa për Shën Bonaventurën, fati i fundmë i njeriut është:
ta dojë Zotin, të takohet e të bashkohet, në dashurinë e tij e tonën. E ky, për të,
është edhe përkufizimi më i mirë i lumturisë së njeriut”. Përparësisë së teorisë
ose të praktikës, Shën Bonaventura i shton një aspekt të tretë – tha Papa- i cili
i përmbledh të dy të tjerët: atë të dijes. Duke mbrojtur këtë tip të reflektimit metodik
e racional të fesë, studiuesi françeskan ndalet tek një konceptim i gabuar i teologjisë
së kohës së tij – por edhe i kohës sonë, sipas të cilit – theksoi Papa…: “… arsyeja
e zbrazka fenë, qenka një sjellje e dhunshme, në krahasim me fjalën e Zotit, të cilën
duhet ta dëgjojmë, por jo ta analizojmë. Këtyre argumenteve kundër teologjisë, të
cilat na bindin për rreziqet që ekzitojnë në vetë teologjinë, Shenjti u përgjigjet:
është e vërtetë se ka një mënyrë arrogante për të bërë teologji, një mburrje të arsyes,
që vihet përmbi fjalën e Zotit. Por teologjia e vërtetë, puna racionale e teologjisë
së vërtetë e të mirë, ka një zanafillë tjetër. Kush dashuron, dëshiron ta njohë gjithnjë
më mirë e më gjatë atë që do (…). Prandaj për Shën Bonavnturën vendin e parë e zë
dashuria”. Për të arritur në këtë konceptim të teologjisë – shpjegoi Papa – Shën
Bonaventura u ndikua, pa dyshim, nga ideja se ‘vendin e parë e zë dashuria”, karakteristike
për karizmën françeskane. Por në këtë ide të njohjes së Zotit në formën e ngjitjes
së vazhdueshme shpirtërore, ndjehet edhe ndikimi i teologut më të lashtë siriak, që
njihet me emrin Pseudo- Dionisi, i cili i kishte ndarë ëngjëjt në nëntë rende: “Shën
Bonavntura i interpreton këto rende të ëngjëjve si shkallë që e afrojnë krijesën tek
Zoti. Kështu ata mund të përfaqësojnë shtegtimin e njeriut, ngjitjen e tij drejt bashkimit
me Zotin”. Gjithsesi, Pseudo-Dionisi është i mendimit se ekziston edhe një këmbë
shkalle, e fundmja, përtej pamjes me arsye e me zemër, e cila për Shën Agostinin –
kujtoi Papa – është kategoria e fundit e njohjes: “Në ngjitjen drejt Zotit mund
të arrihet në një pikë, ku arsyeja nuk sheh më. Por, atje ku bie nata e mendjes, dashuria
vijon të shikojë; ajo sheh atë, që nuk mund ta shohë arsyeja. Dashuria shtrihet përtej
arsyes, shikon më shumë, hyn në thellësinë e misterit të Zotit (…). Pikërisht në natën
e errët të Kryqit, duket e gjithë madhështia e dashurisë hyjnore”.
Ndërmjet
shumë përshëndetjeve, drejtuar shtegtarëve nga të katër anët e botës, Papa kujtoi
në mënyrë të veçantë delegacionin e pranishëm në Sheshin e Shën Pjetrit, ardhur nga
dioqeza amerikane e Trentonit, ku u ndez “Pishtari Benediktin për paqen”. Uroj
që një veprimtari e tillë – theksoi Papa – të kontribuojë për formimin e vetëdijes
së solidaritetit dhe të kulturës së paqes, duke ndjekur shembullin e Shën Benediktit,
apostullit të palodhshëm, që shkriu gjithë jetën ndërmjet popujve të Evropës. E një
përshëndetje tjetër tejet të ngrohtë, Papa ua drejtoi të rinjve, duke pasur parasysh
edhe afrimin e stinës së re. “Takimi me ju – u tha Ati i Shenjtë - më gëzon gjithnjë
e, njëkohësisht, është burim shpresash, sepse mosha juaj është pranverë e jetës. Prandaj
ju uroj të mos e harroni kurrë dashurinë që ka Zoti për ju”.