Kuntis: Kushtet u plotësuan, shqiptarët gati të lëvizin pa viza
Hartuesi i rezolutës së PE-së për Shqipërinë, eurodeputeti Nikolaos Chountis vlerëson
se qeveria shqiptare e Tiranës ka përmbushur në kohë reale çdo dokumentacion që Bashkimi
Evropian i ka paraqitur në kuadër të procesit të liberalizimit të vizave. Në një intervistë
për një agjenci lajmesh greke, eurodeputeti grek thekson se Shqipëria është tashmë
gati për të lëvizur pa viza në hapësirën Shengen. Ai thekson se tashmë është Komisioni
Evropian ai që duhet të bëjë hapin e tij në mënyrë që lëvizja e lirë për qytetarët
shqiptarë të bëhet realitet. Po ashtu, eurodeputeti grek thekson se Bashkimi Evropian
do të ndihmojë Shqipërinë me projekte punësimi në vend. Pasi Rezoluta u votua në Parlamentin
Evropian me 567 vota pro, 47 kundra dhe 19 abstenime, "vlerësimi ynë është se duhet
të mbetet i gjallë përparimi i integrimit të Shqipërisë dhe vendeve të tjera të Ballkanit
Perëndimor, që të integrohen në familjen evropiane", tha Kuntis. Sipas tij, që
të arrihet kjo, duhet, të zgjidhen disa probleme që kanë të bëjnë me të drejtat ndërkombëtare;
probleme këto që janë të shumta, jo vetëm në Shqipëri, por edhe në vendet e tjera
që duan të integrohen në BE. Disa nga problemet që duhet të zgjidhi Shqipëria janë:
probleme politike, shoqërore, ekonomike, të drejtat e njeriut, sistemin e drejtësisë,
etj.