Kardinali Antoneli: familja duhet ndihmuar e duhet vlerësuar, por pa e privatizuar.
(14.07.2010 RV)Familja është burim themelor për shoqërinë: këtë theksoi, këto
ditë, kardinali Antoneli, kryetar i Këshillit Papnor për Familjen. Hirësia e Tij ishte
në Alanson të Francës, për të kujtuar të Lumët Lui e Zélie Martë, prindërit e Shën
Terezës së Krishtit Fëmijë, me rastin e përvjetorit të kurorëzimit të tyre, kremtuar
më 12 korrik 1858. Pasi kryesoi Meshën e rastit, kardinali mbajti edhe një konferencë
me temë: “Familja e ungjillëzimi”.
Një faktor i pazëvendësueshëm, pa të cilin
njeriut do t’i mungonte ngrohtësia njerëzore, ndërsa shoqërisë, themeli kryesor. Me
këtë sy e shikon kardinali Antoneli familjen, duke pasur parasysh familjen shembullore
Martë, karakteristikat kryesore të së cilës ishin dashuria e harmonia e përkryer bashkëshortore;
gëzimi prindëror, pavarësisht nga flijimet; dëshira për t’i edukuar fëmijët me frymën
e lutjes, të solidaritetit për të varfërit, të apostullimit e jo më pak, përgjegjësia
e lartë profesionale e shoqërore. Të dy bashkëshortët punuan gjithë jetën me impenjim
e zgjuarësi, duke i dhënë vendin e duhur kërkesave profesionale e atyre familjare
e duke respektuar, deri në hollësitë më të vogla, të drejtat e punëtorëve, sidomos
të drejtën për t’u çlodhur të dielën. Familja Martë, shtoi kardinali, është mishërim
e model i familjes, për të cilën bota sot ka më shumë nevojë se kurrë, sepse në kulturën
sunduese vijon të ndjehet fort procesi i privatizimit të familjes, e cila po shikohet
gjithnjë e më tepër si mjedis për plotësimin e nevojave afektive, sentimentale
e seksuale të të rriturve, pa menduar fare për krijimin e një bashkimi të qëndrueshëm,
pasuri e pazëvendësueshme për shoqërinë, sepse vatër rreth së cilës rriten e edukohen
breznitë e ardhshme. Familja nuk perceptohet më si bashkësi e vogël, ku secili ka
të drejta e detyra, por si një grumbull njerëzish,që bashkëjetojnë njëkohësisht nën
të njëjtën strehë; nuk është më burim, që duhet vlerësuar, por një mori nevojash e
dëshirash individuale, për t’u plotësuar. E një vizion i tillë ka si pasojë krizën,
në tre drejtime kryesore: në martesë, në lindjen dhe në edukimin
e fëmijëve, aq sa në Bashkimin Evropian numri i divorceve përkon me gjysmën e
martesave. E jo vetëm kaq: të rinjtë, gjithnjë më të vetmuar, marrin rrugën e vandalizmit,
të drogës, të dhunës, duke thelluar krizën e shoqërisë, në të cilën mungojnë idealet,
shpresat, planet e përbashkëta, besimi në të ardhmen. Duke vënë gishtin mbi plagën
e plakjes së shoqërisë, që krijon probleme të rënda, edhe ekonomike, kardinali Antoneli
kujtoi se familja është institucion, në të cilin njerëzit i shërbejnë njëri-tjetrit
me dashuri, pa asnjë interes e, si rezultat, është vatër dashurie e mëshire. Falë
një fryme të tillë, anëtarët e familjes nuk duhet të kthehen kurrë thjeshtë në mjete,
sepse në një familje të vërtetë, secili e shikon tjetrin si pasuri në vetvete, që
nuk mund të zëvendësohet, që nuk mund të shitet e as të blihet. Kardinali nënvizoi
se familja, e bazuar mbi martesën, i ofron shoqërisë pasurinë më të çmuar, qytetarët
me virtyte shoqërore të së ardhmes, e prandaj është më se e arsyeshme të ketë gjithë
mbështetjen e mundshme kulturore, juridike dhe ekonomike. Prej këndej, kryetari
i Dikasterit vatikanas i ftoi shoqatat në mbrojtje të familjes të punojnë me guxim
në shkolla, në famulli, në dioqeze, në mjetet e komunikimit masiv, duke nxitur organizimin
e takimeve e të reflektimeve e duke favorizuar formimin e politikanëve, të drejtuesve
të kulturës e të komunikimit. Sigurisht, pohoi prelati i lartë, doktrina shoqërore
e Kishës i miraton vlerat e vërteta të kohëve të reja, si barazia ndërmjet burrit
e gruas, liria e mendimit dhe e besimit, laiciteti i kuptuar si respekt i pluralizmit
fetar e kulturor. Por Kisha nuk i ngatërron të drejtat e individëve, me ato të familjes,
interesat private, me ato të përgjithshme. Prandaj, pohoi, shoqatat familjare me frymëzim
të krishterë, kërkojnë që familja të mos shikohet si shumë individësh e nevojash individuale,
por si burim i domosdoshëm e i çmuar për shoqërinë, që duhet ndihmuar e vlerësuar.
Prej këndej, ftesa për ta rivlerësuar rolin e prindërve, duke e parë si funksion të
rëndësishëm në pjekurinë dhe realizimin e burrit e të gruas, për të mirën e fëmijëve
e të mbarë shoqërisë. Atëherë mund të themi se ka rëndësi themelore të merren masat
e nevojshme për krijimin e familjeve të qëndrueshme, për pranimin e përgjigjësisë
edukative, e, sidomos, për shtimin e numrit të lindjeve. Masat, që duhen marrë,
mund t’i përmbledhim kështu: më shumë fleksibilitet profesional për bashkëshortët
që punojnë; më shumë siguri ekonomike edhe për kontratat me afat të përcaktuar; më
shumë shërbime për fëmijët, për pleqtë e për njerëzit me aftësi të kufizuara; ulje
më të ndjeshme taksash për familjet me shumë fëmijë; pensionim i parakohshëm për punonjësit
me fëmijë; alternativa konkrete për të shmangur rrezikun e abortit; njohje e të drejtave
të prindërve për të zgjedhur rrugën e edukimit të fëmijëve të tyre; bashkim familjar
për emigrantët. Duke cituar, në përfundim, Këshillimin Apostolik “Familiaris Consortio”,
nënshkruar nga Gjon Pali II në vitin 1981, kardinali Antoneli bëri thirrje për ndërtimin
e një shoqërie, që është mike e familjes!