У Баравікоўшчыне ўспомняць благаслаўлёных мучанікаў
На ўскраіне Налібоцкай пушчы, у вёсцы Баравікоўшчына (паміж Івянцом і Пяршаямі), дзе
ў час вайны благаслаўлёныя а. Герман Стэмпеня і а.Ахілес Пухала аддалі сваё жыццё
за паству, 18 ліпеня 2010 г. у 12.00 адбуддзецца ўрачыстая святая Імша, якую буддзе
цэлебраваць дапаможны біскуп Мінска-Магілёўскай архідыяцэзіі Антоні Дзям’янка. 19
ліпеня 1943 г. немцы вырашылі адпомсціць жыхарам в. Пяршаі за дапамогу партызанам
і павыганялі каля 200 жыхароў з дамоў на вуліцу: жанчын — у адзін хлеў, мужчын — у
другі, з намерам спаліць жыўцом. Да групы мужчынаў далучылі айцоў Ахілеса і Германа,
якія паблагаславілі кабетаў па іх просьбе. За дзень да гэтага камендант паліцыі, які
жыў на плябаніі і быў католікам, папярэдзіў святароў, каб тыя схаваліся, але яны адказалі,
што не могуць пакінуць сваю паству: «Дзе авечкі, там і пастыр». Каля сотні мужчынаў,
у тым ліку святароў, пагналі ў вёску Баравікоўшчына, дзе святароў павялі ў камендатуру,
а потым забілі на ўскрайку вёскі ў адрыне, якую яшчэ і падпалілі. Ёсць сведчанні таго,
што перад смерцю святары вельмі пакутавалі. За сваю веру і адданнасць айцы былі
беатыфікаваы 13 чэрвеня 1999 г. 16 верасня 2000 г. была праведзена эксгумацыя астанкаў
благаслаўлёных а. Ахілеса і а. Германа, а 23 верасня таго ж года адбылося ўрачыстае
перанясенне іх рэліквій у касцёл, дзе яны занялі пачэснае месца ў бакавым алтары святыні.
Рашэннем кардынала Казіміра Свёнтка, тагачаснага Мітрапаліта Мінска-Магілёўскай архідыяцэзіі,
касцёлу св. Юрыя ў Пяршаях быў нададзены статус санктуарыя благаслаўлёных мучанікаў
з ордэна францішканаў а. Ахілеса Пухалы і а. Германа Стэмпеня.