Presidenti Sejdiu përshëndet Rezolutën e Parlamentit Evropian
Presidenti i Kosovës, Fatmir Sejdiu e përshëndeti Rezolutën për Kosovën, të cilën
e miratuan dje me shumicë dërmuese votash anëtarët e Parlamentit Evropian. "Rezoluta
për Kosovën e Parlamentit Evropian paraqet një hap shumë të rëndësishëm cilësor të
këtij institucioni në raport me vendin tonë", tha Presidenti Sejdiu, i cili ritheksoi
se kjo rezolutë dëshmon fuqishëm përkushtimin e vendeve të Evropës për Republikën
e Kosovës dhe qytetarët e saj. "Kjo rezolutë është shumë e rëndësishme edhe për
faktin se ajo në mënyrë eksplicite kërkon nga pesë vendet anëtare të Bashkimit Evropian,
të cilat nuk e kanë njohur ende pavarësinë e Republikës së Kosovës, që ta bëjnë sa
më parë këtë", theksoi Presidenti Sejdiu. Presidenti Sejdiu çmoi lart edhe angazhimin
e deputetes austriake Ulrike Lunaçek, e cila e ka përgatitur këtë rezolutë. Po
ashtu, Presidenti Sejdiu ripërsëriti se vizioni i vetëm i popullit dhe institucioneve
të Republikës së Kosovës është integrimi në Bashkimin Evropian, në NATO dhe në mekanizmat
e tjerë ndërkombëtarë. "Republika e Kosovës është e vendosur t'i plotësojë të gjitha
standardet që i kërkohen në udhën e integrimeve euroatlantike, ndërsa Rezoluta e sotme
e Parlamentit Evropian është një mbështetje konkrete, e cila u jep kurajë të fuqishme
synimeve tona sublime për të qenë sa më shpejt edhe de jure pjesë e familjes së madhe
evropiane", pohoi Presidenti Sejdiu.