Kryqi: hapet seanca në Strasburg, duhet kohë e gjatë për vendim
(30.06.2010 RV)Në Strasburg u hap seanca e dytë për çështjen e ekspozimit të
Kryqit në vendet publike. Zgjati rreth tri orë në Strasburg, seanca para Dhomës
së Madhe të Gjykatës evropiane për të drejtat e njeriut, mbi çështjen e Kryqit në
shkollat publike të italisë. Kujtojmë se është seanca e dytë e kësaj Gjykate. Ka të
bëjë me ankesën e një gruaje finlandeze, me banim në Itali, që ka kërkuar të hiqet
Kryqi nga shkollat. Në seancën e parë, gjykata i dha të drejtë gruas, duke pasur parasysh
se arsimi e edukata duhet të jenë laike. Por Italia, e mbështetur nga 10 vende të
tjera evropiane, paraqiti një ankesë për prishjen e këtij vendimi, duke kërkuar t’i
njihet e drejta për ta ekspozuar Kryqin në vende publike.
Sot 17 gjykatës
të “Grande Chambre” të Gjykatës evropiane për të drejtat e njeriut, dëgjuan argumentet
e qeverisë italiane, paraqitur nga avokati Nikola Letieri, ndërsa për zonjën finlandeze,
foli avokati Nikolò Paoleti. Dhjetë vende anëtare të Këshillit të Evropës, 33 parlamentarë
dhe disa Ong e shoqata, i kujtuan gjykatës se radhiten përkrah Italisë. Vendimi do
të jetë përfundimtar por, sipas burimeve të Gjykatës, derisa të përfundojnë praktikat
zyrtare, do të kalojnë gjashtë muaj ose një vit. Vetëm atëhere do të bëhet publik.
Kryqi është simbol i domosdoshëm fetar e kulturor. Ta heqësh, do të thotë t’ia
presësh rrënjët historisë së Kontinentit. E pohon këtë, në mikrofonin tonë, ipeshkvi
i San Marino-Montefeltre, imzot Luigji Negri:
"Kryqi
është shprehje sintetike, e gjallë; është themel i një ngjarjeje të madhe: inkulturimit
të shoqërisë në shekuj nga ana e fesë. Është sigurisht simbol domethënës, nga i cili
feja katolike nuk mund të heqë dorë. Vetëm të mendosh se mund të hiqet, do të thotë
të bësh një veprim të mirëfilltë barbarie kulturore, sepse shemb themelet e një kontinenti
të tërë. Themelet i hodhi vetë Kontinenti, nuk ia imponoi askush. Themeli është, do
të mbetet atje ku është, njihet a s’njihet. Por nuk mund të përligjen përpjekjet për
ta bërë të padukshëm, sepse popujt evropianë e kanë parë gjithnjë Kryqin si horizont
jete. Në të kanë parë e shohin flijimin e suksesin, humbjen e fitoren, vdekjen e ringjalljen.
Këto janë vlera, pa të cilat njeriu i mijëvjeçarit të tretë, nuk mund të jetojë më
si njeri. Pastaj se disave nuk u bëhet fare vonë sulmohen a mbrohen këto vlera, kjo
është çështje që ka të bëjë me lirinë e ndërgjegjes. Ndërsa për popujt e Evropës,
janë ende pikë referimi. T’ia heqësh, do të thotë ta lësh pa rrënjë!".