Kardinali Uelet është prefekti i ri i Kongregatës për Ipeshkvijtë; Imzot Fizikela,
kryetar i dikasterit për Ungjillëzimin e Ri.
(30.06.2010 RV)Ditë me emërime të rëndësishme, e sotmja, në Vatikan. Siç pritej,
Benedikti XVI emëroi disa kryetarë të rinj dikasteresh, duke përfshirë edhe dikasterin,
për themelimin e të cilit foli dy ditë më parë në Bazilikën e Shën Palit jashtë Mureve
të Romës, gjatë lutjeve mbrëmësore të natës së solemnitetit të Shenjtorëve Pjetër
e Pal.
Benedikti XVI zgjodhi kryeipeshkvin Rino Fizikela për të kryesuar
Këshillin e sapolindur për Nxitjen e Ungjillëzimit të Ri, që do të punojë për të përtëritur
kumtimin e fesë në ato vende, ku jehoi “kumtimi i parë" e ku vijon thellimi i shekullarizimit
të shoqërisë e jo më pak, edhe eklipsi i kuptimit të Zotit”, siç u shpreh vetë Papa
të hënën e kaluar, në sa kremtonte mbrëmësoret në Bazilikën e Shën Palit. Duke nisur
detyrën e re, imzot Fizikela lë dy të mëparshmet: atë të kryetarit të Akademisë Papnore
për Jetën dhe të rektorit të Universitetit Papnor Lateranens. Për t’i kryer këto
detyra Benedikti XVI emëroi dy kryetarë të rinj të këtyre institucioneve papnore:
në krye të Akademisë për Jetën do të jetë imzot Injacio Karrasko de Paula; ndërsa
rektor i Lateranenses, don Enriko dal Kovolo, profesor i letërsisë së krishterë antike
greke pranë Universitetit salezian. Ndërmjet të emëruarve rishtas, spikat figura
e udhëheqësit të ri të Kongregatës për Ipeshkvijtë, kardinalit kanadez Mark Uelet,
rregulltar sulpician, deri tani kryeipeshkëv i Kebek-ut, që zë vendin e kardinalit
Gjovani-Batista Re, i cili del në pension. Një ndryshim edhe lidhur me detyrën
e vëzhguesit të Selisë së Shenjtë pranë OKB-së, në Nju Jork. Kryeipeshkvi Çelestino
Miliore caktohet në një detyrë të re: nunc apostolik në Poloni. Nuk është njoftuar
ende kush do të jetë zëvendësi i tij. Për t’u shënuar edhe se sot paradite Papa
caktoi datën e takimit me imzot André- Mutien Léonard, kryeipeshkëv i Malines-Brukselit,
i cili pak ditë më parë ishte i pranishëm në ngjarjen e hidhur të kontrolleve të
policisë belge në kryeipeshkvi, lidhur me hetimet për shpërdorimet e klerit belg mbi
të miturit, kontrolle që Selia e Shenjtë i dënoi ashpër për mënyrën si u bënë e për
metodat e pashembullta, që u përdorën.