Avokati i Selisë së Shenjtë, pas njoftimit të Gjykatës së Lartë të SHBA: asnjë vendim
lidhur me rastin; jemi në rrugë të drejtë
Avokati i Selisë së Shenjtë në SHBA, Xhefri Lena, lëshoi sot një komunikate shtypi,
pas njoftimit se Gjykata e Lartë nuk do të shprehet lidhur me apelimin e bërë nga
Selia Apostolike. Vatikani i kërkoi Gjykatës federale në Oregon ta ndalonte çështjen
gjyqësore, në të cilën fajsohej se kishte transferuar një meshtar, pa marrë parasysh
se akuzohej për shpërdorime seksuale mbi të miturit. Vendimi i Gjykatës së Lartë të
SHBA për të mos u shprehur mbi kërkesën e Selisë së Shenjtë, nuk është deklaratë lidhur
me çështjen, nënvizon avokati, duke shtuar: kjo tregon që SHBA mendojnë se Selia e
Shenjtë është në rrugë të drejtë lidhur me këtë çështje. Efekti i vendimit të Gjykatës
së Lartë, shpjegon Lena, është që çështja të rikthehet në gjykatën e rrethit të Oregonit,
ku do të dëgjohen mbrojtjet shtesë. Pala e dëmtuar, kujton avokati amerikan, niset
nga teoria gjyqësore sipas së cilës meshtari që ka bërë shpërdorimet, ishte nëpunës
i Selisë së Shenjtë. Natyrisht, sqaron avokati Lena- do t’i shpjegojmë Gjykatës së
rrethit se prifti në çështje nuk është nëpunës i Selisë së Shenjtë e se prandaj kjo
gjykatë nuk mund ta gjykojë Selinë Apostolike. Selia e Shenjtë nuk i paguan rrogë
meshtarit, e as nuk e kontrollon në veprimtarinë e tij të përditshme. Meshtari, rregulltar
i Urdhërit të Shërbëtorëve të Marisë, nuk njihej fare në Selinë e Shenjtë, as para
e as mbas ngjarjeve, që e çuan në gjykatë.