Papa delegacionit të Patriarkanës ekumenike: të përparohet në dialogun për parinë
e papës e për rolin e të krishterëve në Lindjen e Mesme.
(28.06.2010 RV)Sot pasdite Benedikti XVI kryesoi Lutjet e para Mbrëmësore të
Solemnitetit të Shenjtorëve Pjetër e Pal, në Bazilikën e Shën Palit jashtë Mureve
të Romës. Ndërsa nesër paradite do të kryesojë Meshën solemne në Bazilikën e Shën
Pjetrit, në Vatikan, duke nisur nga ora 9.30. Gjatë kremtimit, do t’u vërë mbi supe
paliot e shenjta 38 ipeshkvijve të rinj metropolitë. Ndërkaq, sot paradite Papa priti
në Vatikan një delegacion të Patriarkanës ekumenike të Kostandinopojës, dërguar nga
Bartolomeu I për Festën e Shenjtorëve Pajtorë të Romës. Delegacionin e kryeson metropoliti
i Sazimës, Genadios.
Shpresojmë se dialogu katoliko-ortodoks do të bëjë një
përparim të dukshëm, pohoi Papa gjatë takimit me delegacionin e Patriarkanës ekumenike,
që u karakterizua nga një atmosferë jashtëzakonisht e përzemërt e vëllazërore. Benedikti
XVI nënvizoi se në Sinodin e ipeshkvijve për Lindjen e Mesme, që do të mbahet në tetorin
e ardhshëm, temës së bashkëpunimit ekumenik do t’i kushtohet një vëmendje e dorës
së parë, siç theksohet edhe në Instrumentum laboris, që iu dorëzua prelatëve të zonës
gjatë vizitës së fundit papnore në Qipro: “The difficulties that the Christians
of the Middle East…” Vështirësitë që po kalojnë të krishterët e Lindjes
së Mesme, vërejti Papa, janë karakteristike për të gjithë ata, që jetojnë si pakicë,
duke dëshiruar gjithnjë liri fetare e paqe të vërtetë. Shenjtëria e Tij shtoi se është
e nevojshme të thellohet dialogu me bashkësitë islamike e hebreje, duke shprehur,
më pas, kënaqësinë e tij të thellë për praninë e një delegacioni të Patriarkanës ekumenike
në Sinod. Benedikti XVI kujtoi edhe se Komisoni i përbashkët ndërkombëtar për
dialogun teologjik vijon diskutimet mbi “Rolin e Ipeshkvit të Romës në bashkimin
e Kishës, në Mijëvjeçarin e parë të krishterimit”. Është një çast vendimtar, theksoi
Papa, duke uruar që studimet mbi këtë argument delikat të përparojnë, posaçërisht
në seancën e ardhshme, që do të mbahet në Vjenë: “I thank the Lord that the
relations…” Benedikti XVI falënderoi Zotin për faktin se marrëdhëniet ndërmjet
katolikëve e ortodoksëve karakterizohen nga besimi reciprok, nderimi e fryma vëllazërore,
gjë që e dëshmojnë shumë takime, mbajtur këtë vit, me pjesëmarrjen e përfaqësuesëve
të Kishës katolike e të Kishës ortodokse. E, në përfundim, Ati i Shenjtë kujtoi, si
shenjë inkurajuese të kësaj faze, letrën patriarkale e sinodale shkruar nga Bartolomeu
I, shkurtin e kaluar, në të cilën Patriku ekumenik vë theksin mbi rëndësinë e dialogut!