Drejtori i CIA-s Paneta: Irani mund të ketë bombë atomike brenda dy vitesh
Irani posedon, sipas vlerësimeve të shërbimit sekret amerikan CIA, sasi të mjaftueshme
të uraniumit të pasuruar dobët për dy bomba atomike. Por, ndërtimi i një bombe të
këtillë mund të zgjasë ndoshta deri në dy vjet, deklaroi për televizionin amerikan
drejtori i CIA s Leon Paneta. Shefi i CIA-s nuk beson që masat e fundit ndëshkuese
kundër Iranit mund të ndërpresin programin bërthamor të këtij vendi. Paneta, megjithatë,
është i mendimit se sanksionet e fundit mund të dobësojnë qeverinë e Teheranit dhe
mund t'i sjellin asaj probleme serioze ekonomike.
Shefi i CIA s paralajmëroi
se lufta në Afganistan do të jetë më e vështirë dhe më e gjatë sesa mendohej, përkundër
sukseseve kundër Al Kaidës dhe talibanëve. Leon Paneta tha se SHBA “kanë të bëjnë
me një shtet, i cili ka probleme me qeverisjen, probleme me korrupsionin, probleme
me trafikimin e narkotikëve dhe probleme me kryengritjen e talebanëve”. Paneta tha
se strategjia e presidentit Obama për të dërguar më shumë trupa deri në fund të gushtit
është e drejtë.