«Вечар беларускай опэры й балету ў замку Радзівілаў»

Вечары беларускай опэры й балету ў замку Радзівілаў плянуецца зрабіць традыцыйнымі. Нагадаем, што 25 і 26 чэрвеня Вялікі тэатар опэры й балету Беларусі, сумесна з Нацыянальным гісторыка-культурным музэем-запаведнікам «Нясьвіж» упершыню праводзіць у замку культурную акцыю.
Плянуецца, што пробны праект перарасьце зь вечароў у фэстываль. Цікавасьць да беларускай пляцоўкі маюць артысты опэры зь іншых краін. Ня выключана, што ўжо летам будучага году Нясьвіскі замак стане гасьцінным гаспадаром Міжнароднага опэрнага фэстывалю.
У праграме «Вечара беларускай опэры й балету ў замку Радзівілаў» акрамя опэрнага таксама балетны спэктакль і два канцэрты. Сцэна будзе ўладкаваная ва ўнутраным двары Нясьвіскага замку. Глядацкая заля разьлічаная на 500-700 месцаў.