Sekretaria e Shtetit të Vatikanit e priti me habi e indinjatë mënyrën e kontrollit
në kryeipeshkvinë e Brukselit nga autoritetet belge.
(25.06.2010 RV)Lidhur me hetimet, që kanë të bëjnë me shpërdorimet nga ana
e disa anëtarëve të klerit mbi të miturit, sot Sekretaria e Shtetit të Vatikanit shprehu
indinjatën dhe habinë e thellë, për mënyrën me të cilën forcat belge të rendit kontrolluan
dje selinë e kryeipeshkvisë së Malines-Brukselit, ku prelatët e vendit ishin mbledhur
për asamblenë e tyre mujore. Sekretaria e Shetit bëri të vetin qëndrimin e episkopatit
belg, shprehur në një deklaratë të zëdhënësit të Konferencës ipeshkvnore të Belgjikës. Më
qartë: dje, sipas zëdhënësit të Konferencës ipeshkvnore belge, Eric de Beukelaer,
gjatë takimit mujor të ipeshkvijve belgë, forcat e policisë hynë, rreth orës 10.30,
në selinë e kryeipeshkvisë, duke komunikuar se duhet të ushtronin një kontroll, pas
disa denoncimeve për shpërdorime seksuale në territorin e kryedioqezës. Nuk u dha
kurrfarë shpjegimi tjetër, por u konfiskuan të gjitha dokumentet dhe telefonët celularë
e u lajmërua se asnjë nga të pranishmit nuk duhet të largohej nga kryeipeshkvia. Kjo
gjendje zgjati deri në orën 19. 30. Gjatë kësaj kohe u morën në pyetje të gjithë anëtarët
e Konferencës ipeshkvnore, si dhe ata të personelit. Ipeshkvijtë nuk duan të bëjnë
tani për tani asnjë koment të tepërt, saktëson zëdhënësi i Konferencës, duke nënvizuar
se kanë besim të plotë në drejtësinë dhe përsërisin qëndrimin e tyre kundër çdo shpërdorimi
mëkatar e kriminal të të miturve nga ana e njerëzve të klerit, ashtu si edhe gatishmërinë
për t’i vënë në vend dëmet e shkaktuara, në përkim me drejtësinë e me mësimet e Ungjillit.