Benedikti XVI asamblesë së Roaco: paqe e liri fetare për Lindjen e Mesme.
(25.06.2010 RV)“Toka e Shenjtë, Iraku, Lindja e Mesme, kanë nevojë për dhuratën
e paqes së qëndrueshme e të bashkëjetesës solidare”. Kështu u shpreh sot Papa, i cili
u kërkoi përsëri krerëve të kombeve të garantojnë në mënyrë reale, pa dallim e në
çdo vend, praktikimin publik e komunitar të bindjeve fetare të njeriut. E pohoi këtë,
gjatë audiencës së sotme me pjesëmarrësit e asamblesë së Roaco – (Bashkimi i Veprave
të Ndihmës për Kishat Lindore), duke pasur parasysh sidomos situatën në Lindjen e
Mesme, në sa pas pak ditësh do të merret vendimi evropian mbi ekspozimin e Kryqit
në vendet publike. Gjatë fjalimit, mbajtur në shumë gjuhë, pas përshëndetjes që iu
drejtua nga kardinali Leonardo Sandri, prefekt i Kongregatës për Kishat Lindore, Ati
i Shenjtë vuri theksin mbi kushtet në të cilat jetojnë shumë të krishterë të Lindjes
së Mesme, të cilëve iu drejtua me këto fjalë:
“J’ encourage
les frères et sœurs qui, en Orient... ” “U jap zemër vëllezërve
e motrave të Lindjes së Mesme, që i bashkon dhurata e paçmuar e Pagëzimit, ta ruajnë
fenë e, ndonëse u duhet të bëjnë flijime të mëdha, të mos largohen nga trojet e të
parëve, por të jetojnë aty, ku u lindën. Njëkohësisht, theksoi, i nxis emigrantët
lindorë të mos e harrojnë origjinën e tyre, posaçërisht atë fetare”. Tregoi,
kështu, se është gjithnjë pranë të krishterëve, që pësojnë dhunë për shkak të Ungjillit,
duke ia besuar Zotit të sotmen e të ardhmen e tyre. Ndërsa, pa e kujtuar drejtpëdrejtë,
por duke e nënkuptuar, debatin lidhur me ekspozimin e Kryqit, Papa u shpreh: “Je
compte toujours sur les Responsables…” “Shpresoj gjithnjë tek prijësit
e kombeve, me besim se do të garantojnë në mënyrë reale, pa dallim e kudo, praktikimin
publik e komunitar të bindjeve fetare të çdo njeriu”. Benedikti XVI uroi
për popujt e Tokës Shenjte e të gjithë Lindjes së Mesme, paqe e bashkëjetësë të qëndrueshme,
të cilat, pohoi, lindin nga respekti për të drejtat e njeriut, të familjeve, të bashkësive
e të popujve si dhe nga kapërrcimi i çdo forme të diskriminimit fetar, kulturor e
shoqëror. Ia besoj Zotit, por edhe ju, shtoi, duke iu drejtuar të pranishëmve, thirrjen
që bëra në Qipro për paqe në Lindjen e krishterë”: “Liebe Freunde, tragt
mit eurem Engagement...” Të dashur miq - tha Papa- me impenjimin
tuaj, kontribuoni posaçërisht që meshtarët e Kishave lindore ta pasqyrojnë, në kohën
tonë, këtë trashëgimi shpirtërore”. Në se meshtarët, në shërbimin e tyre,
udhëhiqen nga arsye vërtet shpirtërore, vijoi Papa, shekullarët do të përforcohen
në impenjimin për t’u marrë me punë tokësore, në dritën e thirrjes së tyre të krishterë.
Kujtoi, më pas, Sinodin e ipeshkvijve për Lindjen e Mesme, që do të mbahet tetorin
e ardhshëm, por që ka nisur tashmë të japë fryte bashkimi e dëshmie, për të cilat
edhe është thirrur: “I am pleased at the broad cooperation…” “Shpreh
kënaqësinë time – tha Benedikti XVI- për bashkëpunimin e gjërë të Roaco-së me Kishat
Lindore, lidhur me këtë ngjarje të madhe”. Në pjesën e fjalimit, shqiptuar
në gjuhën italiane, Papa kujtoi imzot Luigji Padovezen dhe vijoi t’u japë zemër të
krishterëve të Lindjes së Mesme: “Të dashur miq – u tha- ju ftoj të jepni
ndihmesën, përmes veprave tuaja, për ta mbajtur gjallë shpresën, që nuk zhgënjen,
ndërmjet të krishterëve të Lindjes. Në grigjën e tyre të vogël shihet tashmë ardhmëria
që dëshiron për ta Zoti e rruga e ngushtë, që po përshkojnë, përshkruhet në Ungjill
si rrugë drejt jetës”.
Situata në Tokën e Shenjtë
ishte këto ditë në qendër të vëmendjes, në takimin e 83-të të Asamblesë së Roaco (Bashkimi
i Veprave të Ndihmës për Kishat Lindore). Si nunci apostolik në Izrael, kryeipeshkvi
Antonio Franko, ashtu edhe Rojtari i Tokës Shenjte, atë Pierbatista Picabala, folën
për situatën në Lindjen e Mesme, duke vënë theksin tek nismat në mbrojtje të të krishterëve.
U vërejt, lexojmë në një komunikatë, se nuk mungojnë përpjekjet për t’u siguruar të
krishterëve të Tokës së Shenjtë e të mbarë Lindjes së Mesme, një ardhmëri më të mirë. Gjatë
takimit, u shkëmbyen gjallërisht mendime lidhur me veprimtaritë parësore baritore,
shoqërore, edukative e asistenciale të Kishës. Vëmendje e posaçme iu kushtua sfidës
ekumenike e ndërfetare. E, sidomos, u theksua se pritet shumë nga Sinodi i ardhshëm,
kushtuar Lindjes së Mesme. Qëndrimi tejet i vëmendshëm ndaj Instrumentum Laboris,
nënvizon komunikata, dëshmon qartë solidaritetin e Kishës universale për të krishterët,
që përpiqen ta ruajnë trashëgimin e fesë së tyre në bashkësi kishtare plot gjallëri,
pranë viseve, të cilat mbarë njerëzimi i quan ‘Shenjte’ sepse i ruajnë, të gjalla,
kujtimet e Shëlbimit të mbarë njerëzimit.