Papa 14 meshtarëve të rinj, shuguruar dje në Shën Pjetër: bëni vullnetin e Zotit,
pa kërkuar pushtet personal.
(21.06.2010 RV)Meshtari i vërtetë nuk synon t’i japë rëndësi vetes, por përpiqet
t’i përshtatet vullnetit të Zotit: ky është një nga fragmentet më domethënëse të homelisë
së Benediktit XVI, mbajtur dje në kremtimin solemn, gjatë të cilit u dha urdhërin
e meshtarisë 14 diakonëve të dioqezës së Romës. Mesha u kremtua nga kardinali Valini,
mëkëmbës i Papës, së bashku me ipeshkvijtë ndihmës, rektorët e seminareve romake e
një numër të madh meshtarësh.
“Bëni vullnetin
e Zotit, duke e dëshmuar Ungjillin me guxim, pa iu nënshtruar modave as opinioneve
të çastit”, i porositi Benedikti XVI 14 meshtarët e rinj të dioqezës së Romës, që
u shuguruan në një Bazilikë, të mbushur plot me besimtarë. Papa nënvizoi, që në fillim,
se Kisha mbarë e falënderon Zotin për meshtarët e rinj, se i shikon plot besim e shpresë
e se pret shumë prej tyre: “Po, Kisha ju shikon me besim e shpresë! Kisha
ka nevojë për secilin nga ju, duke qenë e vetëdijshme për dhuratat që ju jep Zoti
e, njëkohësisht, për nevojën absolute që ka zemra e çdo njeriu të takohet me Krishtin,
Shëlbuesin e vetëm e universal të botës, për të fituar nga ai jetën e re e të amshuar,
lirinë e vërtetë e gëzimin e plotë”. Papa vijoi të shpjegonte liturgjinë
e së dielës. Në qendër të saj ishte fragmenti i Ungjillit, në të cilin Pjetri, duke
menduar ndryshe nga të tjerët, njeh në Jezusin, Krishtin e Zotit. Benedikti XVI theksoi
se burimi i një akti të tillë feje, është gjithnjë lutja. Duke qenë përherë pranë
Zotit, shpjegoi, fitohet një dije, që e tejkalon opinionin e njerëzve e arrihet tek
përngjasimi i thellë me Jezusin. Kjo ka rëndësi themelore për misionin e meshtarit: “Në
lutje, meshtari është i thirrur të rizbulojë fytyrën gjithnjë të re të Zotit të vet
e përmbajtjen më të vërtetë të misionit të vet. Vetëm kush ka lidhje të ngushtë me
Zotin e pushtohet prej Tij, mund t’ua çojë edhe të tjerëve, mund të jetë i dërguar
për të kryer misionin e madh. Kjo do të thotë të rrish gjithnjë me Krishtin, gjatë
gjithë misionit meshtarak. E kjo duhet të jetë pjesa më e rëndësishme e këtij misioni,
posaçërisht në çaste të vështira, kur të duket se dalin në plan të parë punët e rëndomta
të jetës së përditshme”. Kujtoi, kështu, se dishepulli është i thirrur
ta ndjekë Krishtin në udhën e kryqit, ta humbasë vetveten, për ta rigjetur plotësisht
në Krishtin. Ja pra përse, kujtoi Ati i Shenjtë, meshtaria nuk mund të shikohet si
mënyrë për të siguruar jetën ose për të fituar një pozitë në shoqëri: “Kush
e shikon meshtarinë si mjet për rritur prestigjin e pushtetin e vet, tregon se nuk
e ka kuptuar fare natyrën e këtij shërbimi. Kush dëshiron të realizojë ndonjë ambicie
personale, të arrijë suksesin vet, do të mbetet përgjithnjë skllav i vetvetes dhe
i opinionit publik”. Për t’u pëlqyer të tjerëve, vijoi Papa, do të detyrohet
t’i lajkatojë, të thotë atë që u pëlqen, të ndryshojë opinione, të shkojë nga fryn
era, e kështu të shkëputet nga lidhja jetike me të vërtetën, duke u detyruar të shajë
nesër, atë që lavdëroi sot. Meshtari, që e jeton kështu jetën e vet, nuk e do as Zotin
e as të afërmin: do vetëm vetveten e, për paradoks, e humbet vetveten: “Meshtaria,
e kujtojmë gjithnjë, bazohet mbi guximin për të pohuar një vullnet tjetër, atë të
Zotit. E kur bëhemi një me këtë vullnet, kur zhytemi në të, jo vetëm që nuk shlyhet
origjinaliteti ynë, por përkundrazi, hyjmë gjithnjë më thellë në të vërtetën e qenies
sonë e të shërbimit tonë”. Më pas Benedikti XVI vuri theksin tek lidhja
e ngushtë ndërmjet Eukaristisë e Sakramentit të shugurimit meshtarak, duke kujtuar
se meshtarit i besohet flijimi shpërblyes i Krishtit, Korpi i tij i dhuruar e Gjaku
i derdhur. Kur kremtojmë Meshën, theksoi Papa, mbajmë në duart tona bukën e Qiellit,
bukën e Hyjit, Krishtin: “Është diçka, që nuk mund të mos na mahnisë,
të mos na mbushë me gëzim e mirënjohje të pakufi: tashmë dashuria e dhurimi i Krishtit
të kryqëzuar e të lumnuar, kalojnë përmes duarve tuaja, zërit tuaj, zemrës suaj”. Kështu
u tha Papa meshtarëve të rinj e, në përfundim, iu lut Zotit t’u dhurojë vetëdijen,
gjithnjë vigjilente e entuziaste, të dhuratës së Eukaristisë, pa të cilën nuk mund
të jenë meshtarë, e vullnetin për ta flijuar plotësisht veten e për të shërbyer me
përvujtëri, duke u përpjekur t’i ngjasin gjithnjë më shumë Krishtit.