Benedikti XVI Akademisë Papnore Kishtare: nuncët të jenë shenjë e pranisë dhe e dashurisë
së Papës
(14.06.2010 RV)Nuncët apostolikë duhet të jenë ura ndërmjet Kishave të veçanta
dhe Selisë së Shenjtë: kështu u tha sot paradite Papa anëtarëve të Akademisë Papnore
Kishtare, të cilët i priti në audiencë në Vatikan. Benedikti XVI u ndal në konceptin
e përfaqësimit të Atit të Shenjtë, i cili kërkon pasion të vërtetë për bashkimin kishtar.
Papën e përshëndeti imzot Beniamino Stela, kryetar i Akademisë, ku formohen meshtarët
e shërbimit diplomatik të Vatikanit. Por të dëgjojmë cila është detyra e nuncit apostolik,
sipas Benediktit XVI: “Nga njëra anë, të verë në dispozicion të Papës dhe të
bashkëpunëtorëve të tij një vizion objektiv, korrekt e të thelluar të realitetit kishtar
e shoqëror në të cilin jeton, nga ana tjetër, të impenjohet për të përçuar normat,
orientimet, direktivat e Selisë së Shenjtë, jo në mënyrë burokratike, por me dashuri
të madhe për Kishën e me ndihmën e besimit reciprok personal, krijuar me durim, duke
respektuar e duke vlerësuar edhe përpjekjet e ipeshkvijve e rrugën e Kishave të veçanta,
pranë të cilave janë dërguar”. Shërbimi për të cilin përgatiteni, u tha Papa
studentëve të Akademisë Papnore Kishtare, kërkon përkushtim e sakrifica. Por duke
mbetur gjithnjë në marrëdhënie të ngushta me Zotin, kjo do t’ju pasurojë e do t’ju
lidhë me shërbimin e Pasardhësit të Shën Pjetrit për ta mbajtur të bashkuar Kishën: “Në
këtë mënyrë, Përfaqësuesi Papnor – së bashku me ata që bashkëpunojnë me të – bëhet
vërtet shenjë e pranisë dhe e dashurisë së Papës. Kjo është në të mirë të jetës së
të gjitha Kishave të veçanta, veçanërisht në situata vërtet delikate e të vështira.” Ky
përfaqësim i Atit të Shenjtë nuk varet vetëm nga ambienti, ku nuncëve u duhet të punojnë,
por edhe nga ata vetë: “Të bëhesh zëdhënës i Vikarit të Krishtit mund të jetë
punë impenjuese, nganjëherë jashtëzakonisht kërkuese, por kurrë poshtëruese, ose shpersonalizuese.
Përkundrazi, bëhet një mënyrë origjinale për të realizuar thirrjen meshtarake të secilit”.