“Zemra, që të shtyn të dëshirosh gjëra të mëdha”, në qendër të Mitingut të ardhshëm
të Riminit.
(11.06.2010 RV)“Është zemra, ajo që na shtyn të dëshirojmë gjëra të mëdha”.
Këtë titull ka sivjet edicioni të 31-të i Mitingut të miqësisë ndërmjet popujve, që
do të mbahet në Rimini, nga 22 deri më 28 gusht. Gjatë takimit, pjesëmarrësit do të
mund të ndjekin njëqind takime, të shikojnë tetë ekspozita e 18 shfaqje. Në paraqitjen
e ngjarjes së madhe tradicionale, organizuar dje, folën ministri i jashtëm italian,
Fratini dhe drejtuesja e Mitingut, Emilia Guarnieri, të cilët theksuan se takimi i
madh mes popujve do të jetë një shtytje për këtë reflektim: “Njeriu përcaktohet nga
lidhja me pafundësinë, e kjo do të thotë se tek ai ka diçka, që e shtyn të dëshirojë
gjëra të mëdha, të kërkojë gjithnjë atë, që i kapërcen kufijtë e caktuar e që nuk
varet nga ai”. Kjo diçka është zemra, e cila nuk ngihet kurrë, duke e shtyrë njeriun
të ecë rrugë pa rrugë, në përpjekjen për t’u kapur në pafundësi. Gjithsesi, njeriu
ka mall për amshimin e ky mall mund ta nxisë të bëjë gjëra të mëdha. Për këtë e për
vështirësitë, që ndeshen në këtë rrugë, do të rrihen mendime në Rimini, mes njerëzish,
që përfaqësojnë një pjesë të mirë të mendësive të botës.