Filluan kremtimet e Triditëshit të mbylljes së Vitit Meshtarak, me takimin ndërkombëtar
të meshtarëve me Papën
(09.06.2010 RV)Filluan sot paradite kremtimet e Takimit Ndërkombëtar të Meshtarëve
me Papën, për mbylljen e Vitit Meshtarak, shpallur nga Benedikti XVI me rastin e 150
vjetorit të vdekjes së Famullitarit të Shenjtë të Arsit, shën Gjon Maria Vianej. Në
takim marrin pjesë 12 mijë meshtarë, ardhur nga vende të ndryshme të botës. Gjithçka
filloi në Bazilikën e Shën Palit jashtë mureve, në Romë, me meditimin e kryeipeshkvit
të Këlnit, kardinal Joakim Maisner, që u ndoq në videokonferencë edhe në Bazilikën
e Shën Gjonit në Lateran, dy vendet ku po zhvillohet Triditëshi i mbylljes së Vitit
Meshtarak. Duke folur mbi temën “Kthimi në Zotin e misioni”, prelati kujtoi se meshtari
mund të hedhë vështrimin në zemrat e shumë personave nga rrëfyestorja. Rruga e misionit
është pikërisht ky kalim nga njëra anë e rrjetës së rrëfyestores tek ana tjetër, nga
pendestar në rrëfyestar. Fakti që gjithnjë e më pak njerëz i afrohen Sakramentit të
Pajtimit, vazhdoi kardinali Majsner, është baza e shumë të këqiave në jetën e Kishës
e të priftërinjve. Mëkati është pengesa më e madhe, që nuk i lejon njerëzit ta njohin
Krishtin përmes meshtarit. Dashuria më e madhe, që e kapërcen këtë pengesë, është
falja, shpjegoi kardinali Maisner. Të rrëfehesh – theksoi prelati – do të thotë të
ribesosh në Zotin e njëkohësisht, të zbulosh se deri në atë moment nuk ia ke basuar
mjaftueshëm veten, prandaj duhet kërkuar falje”. Gjithnjë në Bazilikën e Shën
Palit, kardinali Klaudio Humes, prefekt i Kongregatës për Klerin, kremtoi Meshën Shenjte.
Gjatë homelisë, ai nënvizoi se meshtari është dishepull i Krishtit e, sipas shembullit
të Birit të Zotit, misioni i tij duhet të përqëndrohet në ndihmën për të varfërit,
të cilët kanë nevojë të ndjejnë afërsinë e Kishës. Edhe ipeshkvijtë, tha kardinali
Humes, duhet të orfojnë vërtet balsamin hyjnor të fesë, por pa lënë mënjanë bukën
materiale. Mbi misionin e meshtarit, prefekti i Kongregatës për Klerin theksoi: “Ky(misioni)
është thirrje dhe mision me domethënie tepër të lartë e me përgjegjësi të jashtëzakonshme,
për të cilin duhet të gjunjëzohemi para Zotit me përvujtëri të madhe, si njerëz të
padenjë e të paaftë, por me besim në hirin e plotfuqishëm të Zotit, që na ka bërë
mjete e ministra të Tij”. Eukaristia e lutja janë dy elementet, që ndikojnë
te meshtari frymën e Shpirtit Shenjt, përfundoi kardinali Humes, duke i këshilluar
priftërinjtë të mos e mbysin kurrë atë. Numri i madh i meshtarëve, që kanë ardhur
në Romë për mbylljen e Vitit Meshtarak, bëri që të kremtohej mesha edhe në Bazilikën
e Shën Gjonit në Lateran, njëkohësisht me atë në Bazilikën e Shën Palit jashtë mureve.
Sekretari i Kongregatës për Klerin, imzot Mauro Piaçenca, pasi lexoi homelinë e kardinalit
Humes, vuri në dukje se misioni i meshtarëve filloi 2 mijë vjet më parë, me peshkatarët
e Galilesë, të cilët duke e lënë veten në dorë të Zotit e duke bërë vullnetin e Tij,
ia ndryshuan përgjithmonë rrugën historisë. Secili prej 400 mijë meshtarëve të shpërndarë
nëpër botë, është i thirrur ta përtërijë çdo ditë këtë mision. Ndërkaq, në Sallën
Pali VI në Vatikan pati çaste artistike e dëshmie, në kuadrin e një nisme të promovuar
nga Lëvizja e Fokolarëve dhe e Shënshtatit, në bashkëpunim me Rinovimin Karizmatik
Katolik Ndërkombëtar, me Bashkimin Apostolik të Klerit dhe me organizma të tjera kishtare.
Lutjet e mbrëmjes u kryesuan nga kardinali Klaudio Humes.