Në Darfur situata vazhdon të jetë kritike. 600 të vrarë vetëm në maj.

(08.06.2010 RV)Në zonën e harruar të Darfurit, në Sudan, gjendja vazhdon të jetë kritike. Vetëm muajin e kaluar sipas burimeve të Kombeve të Bashkuara dhe të Bashkimit afrikan u vranë afro 600 vetë në përleshjet ndërmjet rebelëve dhe trupave qeveritare. Janë këto shifra që e bëjnë të kuptueshëm misionin e operatorëve të paqës në terren pas shtatë vitesh konflikt dhe përpjekjeve të pafrytshme të gjykatës ndërkombëtare për të vënë në bankën e të akuzuarve përgjegjësit e këtyre krimeve. Po nga ana tjetër në Doha, Katar, po nisin përgatitjet e bisedimeve për paqë ndërmjet qeverisë së Kartumit dhe një grupi ku bëjnë pjesë përfaqësues të rebelëve të Darfurit.
Mbi mundësitë për paqë, në mikrofonin e Radios Vatikanit flet përfaqësuesi i Bashkësisë së Shën Egjidit, Vitorio Shelco:

Përgjigje: Situata në Sudan, në përgjithësi është shumë e ndërlikuar. Po i afrohemi një kthese vendimtare, që do të jetë ajo e referendumit për pavarësinë e jugut, që do të kremtohet në janar të vitit 2011. Pra, letrat në dorë po përzihen rishtas. Është e nevojshme që problemi të shqyrtohet nga anë të ndryshme. Këto janë çaste të vështira në të cilat aleancat ndryshojnë, ku ekuilibret në zonë janë në rrezik dhe prandaj është i nevojshëm një impenjim më i madh i bashkësisë ndërkombëtare. Po ashtu, duhet thënë se ndonëse përleshjet kanë rifilluar, kjo nuk do të thotë se nuk ka më mundësi për zgjidhje nëpërmjet bisedimesh.