Konferenca e Edimburgut: thirrje e Kishave për të dëshmuar sëbashku Krishtin
(08.06.2010 RV)Me një këngë të gëzueshme afrikane, përfundoi këto ditë Konferenca
botërore, që mblodhi në Edimburg të Skocisë rreth 300 delegatë nga të gjitha besimet
e krishtera. Takimi u zhvillua për të kremtuar 100 vjetorin e kuvendit të parë të
madh ekumenik mbi misionin, mbajtur pikërisht në kryeqytetin skocez, në vitin 1910.
Për një javë, delegatët diskutuan mbi sfidat e misionit në shekullin XXI, në grupe
e në tryeza të rrumbullakta. Konferenca përfundoi me një kremtim ekumenik, transmetuar
me internet, në përfundim të të cilit u lexua thirrja drejtuar të gjitha Kishave,
për të dëshmuar sëbashku Krishtin, duke marrë kështu pjesë në misionin e dashurisë
së Zotit. “Me urgjencë të madhe – lexohet në tekst – jemi të thirrur të shpallim Lajmin
e Mirë të shëlbimit, të faljes së mëkateve, të jetës në plotësi dhe të çlirimit për
të gjithë të varfërit e të shtypurit”. Delegacioni i Kishës Katolike udhëhiqej
nga imzot Brajën Farell i Këshillit Papnor për nxitjen e bashkimit ndërmjet të krishterëve.
Ai u solli pjesëmarrësve mesazhin e Papës, ku Benedikti XVI uron që të punohet me
përvujtëri e me durim, nën udhëheqjen e Shpirtit Shenjt, për të rijetuar sëbashku
trashëgiminë e njëjtë apostolike.