“Bashkim, dialog, paqe”: editorial i atë Federiko Lombardit për ‘Octava Dies’.
(06.06.2010 RV)Nga Qipro, ku shoqëron Papën, atë Federiko Lombardi ia kushton
editorialin për Octava Dies, e përjavshme informative e Qendrës Televizive të Vatikanit,
shtegtimit të 16-të apostolik të Benediktit XVI. Titullohet: Bashkim, dialog,
paqe”:
“Një
shtegtim për bashkimin kishtar, për dialogun ekumenik, për durimin, në përpjekjen
për paqe. Këto, qëllimet e vizitës në Qipro, që Papa i sqaroi, duke biseduar me gazetarët
gjatë fluturimit drejt Ishullit. Sinodi i Ipeshkvijve të Lindjes së Mesme, që do
të kremtohet në tetor, do të jetë një rast takimi e, prandaj, edhe njohjeje reciproke,
ngushëllimi të anasjelltë, kërkimi të përbashkët të udhëve të dëshmisë për bashkësitë
më të vogla e më minoritare, si dhe për ritet e traditat e ndryshme. Për katolikët,
prandaj, është mesazh bashkimi e inkurajimi, jo për t’u mbyllur në vetvete, por për
të qenë më të aftë në dëshmi e në shërbim, më të gatshëm për ta bërë të dukshme pasurinë
e pranisë mijëravjeçare të krishterë në trojet ku zu fill feja jonë. Takimi me ortodoksët
do të shënojë hapa të rinj përpara në një udhë premtuese, në të cilën bëhet gjithnjë
më e qartë nevoja për dëshminë e përbashkët të vizionit të krishterë të njeriut e
të jetës në botën e sotme, në të cilën vlerat e krishtera sfidohen e shpesh, edhe
kundërshtohen rrënjësisht. Ndryshimet teologjike nuk duhet të na bëjnë të harrojmë
se aspektet që na bashkojnë, janë shumë më të rëndësishne se ata që vijojnë të na
ndajnë. E së fundi, nuk duhet harruar mundimi durimtar për ta kumtuar paqen, pavarësisht
nga episodet, që shkaktojnë shqetësim e ligështim. Misioni shpirtëror e fetar i Papës
vijon me të njëjtën frymë, që pati shtegtimi i tij, vitin e kaluar, në Tokën Shenjte.
Ungjilli mbetet burim i pashterrshëm shprese, për të shembur muret e përçarjeve më
të thella”.