Lumnimi i atë Jerzhi Popielushkos. Papa: Martirizmi i tij, shenjë e fitores të së
mirës mbi të keqen!
(06.06.2010 RV)Sot Polonia ishte në festë. Gjatë një kremtimi solemn eukaristik
në Sheshin e Varshavës ‘Mareshall Jozef Pilsudski”, Kisha katolike ngriti në nderimet
e elterit një të Lum të ri. Është atë Jerzy Popieluszko (Jerzhi Popielushko)
(1947-1984), viktimë e regjimit filosovjetik. Në jetën e tij të shkurtër, devocioni,
bamirësia, vuajtja e dashuria apostolike e deri rebelimi, u lidhen gjithnjë me dritën
e Ungjillit. Vërtetoi, në këtë mënyrë, se njeriu i butë mund të jetë edhe shumë guximtar.
Kështu jeton prej 26 vjetësh në zemrën e polakëve, pasi pati jetuar 37 vjet ndër ta
e për ta. I Lumi i ri eci
gjithnjë në udhën e martirizimit. Kapelan i lëvizjes ‘Solidarnosh’, u mbyt mizorisht
gjatë regjimit komunist, në Poloni. Martir i fesë dhe i lirisë, i nxiste gjithnjë
bashkatdhetarët e tij të rebeloheshin në mënyrë paqësore kundër diktaturës, në emër
të Ungjillit. “Njeriu që dëshmon të vërtetën – thoshte atë Popielushko - është njeri
i lirë, edhe në pranga”. Benedikti XVI nga Qipro e kujtoi këtë ngjarje të madhe,
duke u drejtuar polakëve një përshndetje nga më të përzemërtat: „Serdeczne
pozdrowienie kieruję do Kościoła w Polsce.. I drejtoj
përshndetjet e mia të përzemërta Kishës në Poloni, që galdon sot për lartimin në elter
të atë Jerzhi Popielushkos. Shërbimi i zellshëm dhe martirizimi i tij, janë simbol
i fitores së Zotit mbi çdo forcë të së keqes. Uroj që shembulli i tij dhe ndërmjetësimi
i tij të rrisin zellin e meshtarëve e të përflakin dashurinë e besimtarëve laikë”.
Prandaj meritoi nderimin më të lartë: atë të elterit. Kremtimin
madhështor të lumnimit të Martirit polak, e kryesoi kryeipeshkvi Anxhelo Amato, salezian,
prefekt i Kongregatës për Çështjet e Shenjtorëve, përfaqësuesi i Benediktit XVI. Imzot
Amato theksoi, në mikrofonin e Radio Vatikanit, se i Lumi Popielushko iu kundërvu
një pushteti të egër e vrasës, për t’u kumtuar të gjithëve se njeriu është krijuar
për liri e drejtësi:“Dëshiroj të ngul këmbë tek mesazhi i Shërbëtorit të Zotit,
Jerzy Popieluszko, që është mesazh i vëllazërimit ndërmjet njerëzve, i respektimit
të dinjitetit të çdo njeriu, edhe më të voglit, më të humburit, më të harruarit, më
të pambrojturit; i lirisë së ndërgjegjes, që asnjë regjim nuk mund ta dhunojë. Përvoja
tragjike e shekullit të kaluar na mëson se regjimet e ideologjitë kalojnë si stuhi
të tërbuara, duke lënë pas gërmadha fizike e shpirtërore, ndërsa feja e krishterë,
me rrënjë në Ungjill, mbetet e vijon të sjellë gëzim, paqe e harmoni!”.