Ati i Shenjtë në Katedralen Maronite: t’ia çojmë Lajmin e Mirë të jetës sonë në Krishtin,
mbarë njerëzimit!
(06.06.2010 RV)Veprimtaria e parafundit e Papës në Nikozi, ishte vizita në
Katedralen Maronite të Zojës së Hireve. Kisha, që mund të zërë 300 vetë,
ishte përplot. Të pranishëm më se 300 besimtarë maronitë, me korin e tyre si dhe Komiteti
organizator. Vizita nisi me përshëndetjen e kryeipeshkvit maronit të Qipros. Më pas Benedikti
XVI iu drejtua besimtarëve maronitë, që i përkasin bashkësisë më të madhe katolike
në Ishull: “Duke vizituar këtë ndërtesë, kryej në zemrën time një
shtegtim shpirtëror në të gjitha kishat maronite të ishullit. Ju siguroj se, me kujdesin
e një ati, jam pranë çdo besimtari të këtyre bashkësive të lashta”. Benedikti
XVI vërejti se kjo kishë katedrale është simbol i historisë shumëshekullore , shpesh
tejet të trazuar, të bashkësisë maronite në Qipro: “Maronitët arritën
në këto brigje në periudha të ndryshme gjatë shekujsh e iu desh të përballojnë prova
të rënda për t’i qëndruar besnikë trashëgimisë së tyre të posaçme kristiane. E, duke
i kapërcyer me guxim, arritën ta ruajnë të paprekur fenë e etërve”. Papa
pohoi edhe se kjo katedrale na kujton një të vërtetë të rëndësishme shpirtërore: “Së
bashku me të krishterët e shpërndarë nëpër botë, jemi pjesë e atij tempulli të madh,
që është Korpi Mistik i Krishtit. Kulti ynë shpirtëror, i cili ofrohet në shumë gjuhë,
në shumë vende e në një larmi të bukur liturgjish, është shprehje e një zëri të vetëm,
zërit të Popullit të Zotit, që mblidhet për t’u lutur e për ta falënderuar Atë, në
një bashkim të vazhdueshëm njëri me tjetrin. Ky bashkim, që është kaq i çmuar për
ne, na nxit t’ia çojmë mbarë njerëzimit Lajmin e Mirë të jetës sonë të re në Krishtin”. Në
përfundim, duke folur greqisht, Papa i siguroi besimtarët maronitë se lutet që Kisha
e tyre, në bashkim me barinjtë e me Ipeshkvin e Romës, të përparojë në shenjtëri,
në besnikërinë ndaj Ungjillit e në dashurinë e krishterë ndërmjet besimtarëve. Kremtimi
vijoi me Lutjen e faljes, sipas liturgjisë siriake, kremtuar nga patriku maronit,
Fortlumturia e Tij, kardinali Nasrallah Sfeir. Më pas u këndua himni kushtuar Zonjës
së Bekuar. Lutjet u thanë në gjuhën greke, arabe e angleze.Në përfundim të kremtimit,
Papa u largua nga katedralja drejt aeroportit Ndërkombëtar të Larnakës.