Dioqeza e Friburgut: akuzat kundër imzot Colish të pabaza
(03.06.2010 RV)Një akuzë “e pabazë” që ka si synim “të ngjallë interesin e
mediave”. Kjo nënvizohet në një notë të zëdhënësit të dioqezës së Friburgut, në lidhje
me lajmin sipas të cilit kryeipeshkvi Robert Colish, kryetar i konferencës ipeshkvnore
gjermane, është nën hetim gjoja për fshehje të një rasti pedofilie. Nota e dioqezës
i referohet një rasti të abuzimit seksual të një rregulltari benediktin në kuvend,
në vitet ’60, gjë për të cilën dioqeza u patë vënë në dijeni në fund të vitit 2006.
Komunikata thekson se në vitin 1987, përgjegjësi për meshtarët e dioqezës, Imzot Colish
nuk ka ditur gjë as për akuzat e viteve ’60, e as për detyrën e re të rregulltarit
në fjalë. Abacia e Birnau është “abaci territoriale” tërheq vëmendjen nota, rrjedhimisht,
është krejtësisht e pavarur nga ipeshkvi dioqezan. Prandaj, është abati ai që merr
vendime, edhe mbi personelin, në territorin ku ka kompetencë, pa qenë nevoja të informojë
ipeshkvin, përfundon komunikata e dioqezës së Friburgut.