Sot Kisha katolike përkujtoi Shën Marçelinin dhe Shën Pjetrin.
(02.06.2010 RV)Ishin të dy të krishterë të bashkësive të para romake. Si u
zbulua që kishin rrokur fenë e Krishtit, u zvarisën jashtë qytetit, në një vend që
njihet me emrin “Dy Lasuret”, gjatë Rrugës Labikana, pranë trojeve të lateranëve,
pikërisht atje ku sot lartohet bazilika e famshme e Shën Gjonit në Lateran, njëra
nga bazilikat patriarkale romake e seli e ipeshkvit të Romës. Këtu i detyruan t’i
bëjnë varrin vetes duke e gërmuar me duar. Si u bë gati gropa, ua prenë kokat. Trupat
e tyre ranë në varrin e hapur e u mbuluan sakaq me dhé. Disa ditë më pas, matrona
e përshpirtshme, Lucilla, i mori trupat e tyre dhe i varrosi me nderim. Perandori
Kostandin, sipas dëshirës të së ëmës, ngriti mbi eshtrat e martirëve një bazilikë
madhështore e po aty, ndërtoi mauzoleun, ku vendosi trupin e Elenës, para se ta çonte
për të pushuar në banesën e fundit, në Kostantinopojë.