Papa kërkon solidaritet ndërkombëtar për Guatemalën, goditur nga stuhia tropikale
‘Agata’.
(02.06.2010 RV)Papa shpreh dhimbjen e tij të thellë për viktimat, më se 150,
shkaktuar nga stuhuia tropikale ‘Agata’. Në një telegram, nënshkruar nga kardinali
Tarçizio Bertone, sekretar i Shtetit të Vatikanit, drejtuar nuncit në Guatemalë,
imzot Paul Rikard Galager, Benedikti XVI thekson se e ndjen veten shpirtërisht pranë
familjarëve të atyre që humbën jetën, pranë të plagosurve e turmës të të shpërngulurve,
shtëpitë e të cilëve u dëmtuan rëndë ose u shkatërruan fare. Prej këndej, Ati i Shenjtë
i bën thirrje bashkësisë ndërkombëtare dhe të gjithë njerëzve vullnetmirë që, të vënë
në lëvizje nga solidariteti vëllazëror, t’i japin ndihmesën e nevojshme këtij vendi,
që të mundet, kështu, t’i kapërcejnë këto çaste kaq të vështira. Ndërkaq Këshilli
Papnor “Cor Unum”, si shenjë konkrete e afërsisë së Papës për guatemalasit, do t’i
dërgojë menjëherë ndihma popullsisë së vendit të vogël qendroamerikan.