Mbledhja e Sarajevës ripohoi impenjimin evropian për integrimin e Ballkanit në BE
(02.06.2010 RV)U zhvillua sot mbledhja një-ditore e Sarajevës për t’u dhënë
garanci vendeve të Ballkanit Perëndimor se Brukseli e shikon pozitivisht integrimin
e tyre në Bashkimin Evropian. Natyrisht, jo pa plotësuar një sërë kushtesh, si forcimi
i rolit të ligjit, lufta kundër korrupsionit dhe krimit të organizuar, sigurimi i
lirisë së mediave dhe i bashkëpunimit rajonal. Në takimin e trumbetuar prej kohësh,
morën pjesë Shqipëria, Kosova, Bosnja, Kroacia, Maqedonia, Mali i Zi dhe Serbia, të
cilat janë në stade të ndryshme në procesin e anëtarësimit në Bashkimin Evropian.
Ishin gjithashtu të pranishëm edhe përfaqësuesit e vendeve evropiane, ata të Rusisë,
të Turqisë, të SHBA-ve, si edhe krerë të institucioneve evropiane. Analistët nuk
besojnë në rëndësinë e këtij takimi, i cili bëhet në 10-vjetorin e mbledhjes së Zagrebit,
ku për herë të parë, Brukseli i premtoi Ballkanit Perëndimor një të ardhme në gjirin
e Bashkimit Evropian. Nga njëra anë, sidomos në Bosnjë, popullsia është lodhur së
prituri integrimin në institucionet evropiane, e nga ana tjetër, mbledhja u zhvillua
në një nivel më të ulët nga parashikimi, për t’u lejuar Serbisë e Kosovës të merrnin
pjesë sëbashku. Vërtet, mbledhja përdori formën “Xhimnik”, që i paraqet pjesëmarrësit
me emër dhe jo me detyrën që kanë, ose me emrin e vendit nga vijnë. Gjithashtu, Beogradi
arriti të vendosë pranë përfaqësuesit të UNMIK-ut, Lamberto Zannier, ministrin e jashtëm
të Kosovës, Skënder Hyseni, për të theksuar faktin se Serbia e njeh Kosovën vetëm
në kuadrin e marrëveshjes 1244 të Këshillit të Sigurimit. Shqipëria përfaqësohej nga
ministri i jashtëm, Ilir Meta.