Vizita e imzot Ravazit në Ukrainë, me qëllime baritore dhe për dialog ekumenik
Javën e kaluar, kryetari i Këshillit Papnor për Kulturën, imzot Xhanfranko Ravazi
ishte për vizitë në Ukrainë. Qëllimi i këtij udhëtimi ishte aktualizimi i rezultateve
të Sinodit të ipeshkvijve mbi Fjalën e Zotit në situatën e Kishës ukrainase dhe vlerësimi
i traditës kulturore të krishterë të vendit. Imzot Ravazi mori pjesë në Konferencën
ndërkombëtare organizuar nga Kisha greko-katolike, me temë “Fjala e Zotit në jetën
e në misionin e Kishës në Ukrainë”. Vizita, që përfundoi të premten, u karakterizua
edhe nga ekumenizmi, me takimin në Kiev me Mitropolitin Vladimir, të Kishës Ortodokse
të Patriarkatit të Moskës. Të dëgjojmë vetë imzot Xhanfrako Ravazin, në mikrofonin
tonë: Prania ime në Ukrainë lidhet sidomos me një temë të veçantë. Para së
gjithash, me përmasën kulturore të Biblës: ta shikojmë Shkrimin Shenjt si pasuri kulturore
për qytetërimin evropian. Kjo sjell marrjen në shqyrtim jo vetëm të cilësive teologjike,
por edhe të atyre letrare të Biblës. Kjo, që ishte përmasa kryesore e udhëtimit tim
në Ukrainë, u pasurua edhe me tre elemente të tjera. Së pari, takimi me kulturën e
këtij vendi. Vizita në qytetin e Lvivit, të cilin nuk e njihja, më bëri shumë përshtypje,
sidomos kur pashë shumëllojshmërinë e stileve, që tregojnë për një kulturë të pasur.
Së dyti, takimi me botën civile. Së treti, natyrisht, edhe përmasa ekumenike, sepse
pa dyshim që Ukraina është një territor ku bashkëjetojnë shumë konfesione të krishtera.
Dialogu ekumenik ka çaste intimiteti e çaste vështirësie. Por dialog, do të thotë
edhe ta mendojmë ndryshe nga njëri-tjetri, jo gjithmonë në sintoni. Po marr një shembull
muzikor, duetin: ky mund të jetë me një soprano dhe me një bas, që janë dy zëra të
kundërt. Basi nuk duhet të këndojë në falset për të imituar sopranon dhe sopranoja
nuk duhet të ulet në nivelin e basit. Secili ka identitetin e vet, por nëse është
vërtet dialog, krijon harmoni. Por kjo nuk është e lehtë e kërkon përpjekje afatgjata.