Të dielën e sotme më 30 maj, Kisha kremton Festën e Trinisë Shenjte.
Gjithnjë sot më 30 maj kalendari Kishtar kujton edhe Shën Ferdinandin, mbret i
Kastiljes e Shën Zhanën d’Ark, virgjër. Festa e sotme na thërret jemi bashkësi
dashurie e jete sepse Zoti nuk është vetmi e pafund, por “bashkim drite e dashurie:
këtë na kujton misteri i Njënisë dhe e Trinisë së Tënzot. Hyji është jetë e dhuruar
dhe e marrë në një dialog të amshuar ndërmjet Atit e Birit, në Shpirtin Shenjt – i
Dashuruar, i Dashur e Dashuri, siç shprehet Shën Agostin. Nesër e hënë 31 maj,kalendari Kishtar kremton festën e Pasisë së Zojës së Bekuar, e Kisha mbyll
muajin kushtuar nderimit të Virgjërës Mari. Zoja e Bekuar shkon të vizitojë Elizabetën.
Nuk shkon për të kaluar kohën. Bën një udhëtim të vërtetë apostolik, gjatë të cilit
kumton Fjalën që i tha Engjëlli i Tënzot dhe këndon mrekullitë e Zotit në jetën e
saj. Është dita e fundit e majit, kushtuar Zojës së Bekuar, që kremtohet në të
gjitha Kishat katolike të botës, e në këtë ditë në të cilën kremtohet festa e Pasisë
së Zojës, liturgjia shpjegoi se Vigjëra Mari është ikonë mahnitëse e Kishës, me rininë
e saj të përhershme, që buron nga Shpirti Shenjt Zot, e Kishës, misionare e Fjalës
së Hyjit të Mishëruar.
Të martën e ardhshme më 1 qershor, kalendari
përkujton Shën Justinin, filozof e martir. Liturgjia e ditës na kujton se Zoti
e do popullin e vet, se i prin drejt së vërtetës, drejt takimit me Hyjin Atë. Zoti
zgjedh në histori figura të veçanta për t’i dhënë mesazhe të fuqishme popullit të
vet.
Edhe sot, si në kohët e largëta, ftohemi t’i hapim mend e zemër, për
t’i bërë vend fjalës që shëlbon. Këtë na kujton festa e Shën Marçelinit meshtar,
e Shën Pjetrit ekzorçist e martir dhe e shën Eugjenit, papë, që do të kremtohet të
mërkurën më 2 qershor.
Të enjtën e ardhshme më 3 qershor, kalendari
Kishtar do të kremtojë Solemnitetin e Korpit e të Gjakut të Krishtit. Kremtimi
i kësaj feste të rëndësishme liturgjike, në shumicën e vendeve të botës shtyhet, edhe
në trevat shqiptare, kështyhet për të dielën e ardhshme, për t’u mundësuar besimtarëve
një pjesëmarrje sa më të madhe, meqënëse të enjtën është ditë pune. Solemniteti
i Korpit e Gjakut të Krishtit na nxit të reflektojmë se dashuria për Zotin nuk mund
të ndahet nga dashuria për të afërmin: janë dy faqe të së njëjtes medalje e stil i
një jete, që e ka themelin e vet tek Krishti i vdekur e i ngjallur, që na la si trashëgim
dashurie, Korpin e Gjakun e vet.
Gjithnjë të enjtën më 3 qershor, kalendari
Kishtar përkujton edhe Shën Karl Lvanga me shokë, martirë të Ugandës dhe Shën Klotilda,
mbretëreshë e frankëve. Liturgjia na kujton që Jezusi kumton Pashkët e tij,
por dishepujt duket se nuk kujtohen fare për këtë: arsyetojnë me logjikën njerëzore
të pushtetit. E edhe ne si ata. Logjika e Kryqit mund të fitohet vetëm me shpirtin
e shërbimit. Të premten më 4 qershor kalendari do të përkujtohet
Shën Françesk Karaçiolo, meshtar, themelues i Klerikëve të Vegjël Rregulltarë dhe
e Shën Kuirini, martir. Na kujtojnë se njeriu i drejtë i jep lumni Hyjit me bindjen
se feja nuk është prona jonë. Na u dorëzua që të kujdesemi për të, ashtu si vreshti
vreshtarëve. Kemi përgjegjësi për lulëzimin e vreshtit, por nuk jemi i zoti. Liturgjia
e së shtunë më 5 qershor, na kujton se secili nga ne është i thirrur të japë kontributin
e tij për ndërtimin e një realiteti më të mirë, duke i ndihmuar për këtë edhe autoritetet
civile. Është festa e Shën Bonifacit, ipeshkëv e martir, apostull i Gjermanisë.
Të dielën e ardhshme më 6 qershor, bie e diela e X gjatë
vitit kishtar. Po këtë ditë më 6 qershor, kalendari Kishtar përkujton edhe festën
e Shën Norbertit, ipeshkëv i Magdenburgut, themelues i Kanonikëve Rregulltarë Premostratens;
e Shenjtërve Artemi e Paolina, martirë dhe Shën Klaudio, abat e ipeshkëv, Liturgjia
e ditës na kujton se në bisedën që bëjnë saduçejtë e farizenjtë me Jezusin, gjejmë
gjithnjë të vërteta të mëdha e sot, të vërtetën se Zoti është përherë i pranishëm
në jetën tonë jo si gjykatës, as si padron, por si Atë që kujdeset gjithnjë për të
bijtë.